"მანჩესტერ იუნაიტედის" მთავარმა მწვრთნელმა კლუბის ოფიციალურ ტელევიზიას განუცხადა, რომ "ასტონ ვილასთან" მატჩში ანდერ ერერას მონაწილეობა "აპტონ პარკზე" მიღებული მცირე ტრავმის გამო საეჭვოა.

უეინ რუნი "ვესტ ჰემთან" მატჩში პირველად დაუბრუნდა მოედანს ხანგრძლივი პაუზის შემდეგ და მწვრთნელის თქმით, მომდევნო მატჩშიც მიიღებს კაპიტანი გარკვეულ სათამაშო დროს.

ბასტიან შვაინშტაიგერის მდგომარეობა კვლავ რთულია და მიმდინარე სეზონში მისი მოედანზე დაბრუნება სათუოა, ხოლო ლუკ შოუ ფიზიოთერაპევტთან წარმატებულად ვარჯიშობს და მწვრთნელის თქმით, "დიდებულად შრომობს".

"ჯერ დარწმუნებით ვერ ვიტყვი, ერერამ ტრავმა მიიღო, მაგრამ პრობლემა ის არის, რომ ისევ ორ დღეში გვიწევს ფორმის აღდგენა. ეს განგრძობითი პრობლემაა, რადგან როცა ამდენ ტურნირზე თამაშობ ერთ სეზონში, ბევრი მატჩის ჩატარება გიწევს, ეს არის ერთადერთი პრობლემა.

რუნის ყოველთვის სურს თამაში. დიახ, ვფიქრობ, უფრო მეტ დროს მიიღებს, თუმცა ეს თამაშზეა დამოკიდებული. წინასწარ ვერ იტყვი, რომ 20 წუთს მისცემ ან რამე მსგავსი; თუ ეს შესაძლებელი იქნება, გავაკეთებ კიდეც, რადგან უეინი გუნდში გვჭირდება.

არა მგონია, შვაინშტაიგერმა ამ სეზონში ითამაშოს- ვფიქრობ, მომდევნო სეზონისთვის იქნება მზად. იქნებ ევროპის ჩემპიონატისთვისაც იყოს მზად, წინასწარ ვერ ვიტყვი. შესაძლებელია, მაგრამ ესეც ჩვენთვის სასარგებლოა, რადგან ახალი ტურნირისთვის ფორმაში გვეყოლება. შოუ მოედანზე და ფიზიოთერაპევტთან ვარჯიშობს, მაგრამ არა ვარჯიშების მწვრთნელთან, ეს კი სხვადასხვა რამეა. თუმცა დიდებულად, დაუჯერებლად შრომობს", - განაცხადა ვან გაალმა.

ჰოლანდიელს ჰკითხეს, მოუწევდა თუ არა როტაციის გამოყენება რთულ კალენდართან გასამკლავებლად, რაზეც უპასუხა: "დიახ, დიახ, ასე მგონია. ვალდებულიც ვარ. ფეხბურთელებისთვისაც კარგია, ჩემი აზრით, მაგრამ ჯერ უნდა მოვიცადო და ვნახო, გავაკეთებ თუ არა ამას ხვალ ან "პალასის" წინააღმდეგ. ინგლისის თასზე "ევერტონთან" მატჩი არის შეხვედრა, სადაც უძლიერესი გუნდი უნდა გამოვიყვანოთ, რა თქმა უნდა".

წყარო: manutd.com