"მანჩესტერ იუნაიტედის" ყოფილმა ნახევარმცველმა ლუი ვან გაალი და მისი მეთოდები გააკრიტიკა.

2014 წელს სამუშაოდ "ოლდ ტრაფორდზე" გადასვლის შემდეგ ლუი ვან გაალმა გუნდიდან ერთ-ერთი პირველი ლუიშ ნანი გაუშვა. პორტუგალიელი ჯერ "სპორტინგში" ასპარეზობდა იჯარის წესით, შემდეგ კი "ფენერბაჰჩეში" გაიყიდა 5 მლნ. ფუნტად.

29 წლის ფეხბურთელი ვან გაალს აკრიტიკებს და ფიქრობს, რომ ჰოლანდიელი ფეხბურთელებს ბავშვებივით ეპყრობა.

"იმ ზაფხულს წინასასეზონო მატჩებში თითქმის არ მიყენებდა. ყველაზე ცოტა სათამაშო დრო მე მომეცა და ვიცოდი, რომ ამ მწვრთნელს ჩემი იმედი არ ჰქონდა.

რამაც გამაკვირვა, ეს ფეხბურთელებისადმი დამოკიდებულებაა. დამხმარეებთან ერთად მათ ისე უყვიროდნენ, თითქოს 18 წლის ბიჭები ყოფილიყვნენ. ასეთი მიდგომა დაუშვებელია, მე ხომ პროფესიონალი ვარ, ყოველდღე ვვარჯიშობ და ჩემს სარგებლიანობაში დაეჭვების საფუძველს არ ვიძლევი.

მუდამ გვიყვიროდნენ: "ასეთი პასი მიეცი, ეს გააკეთე". ეს სიგიჟე იყო. ფეხბურთში გადაწყვეტილებებს ინსტინქტის დონეზე იღებენ. იქ ერთი შეხებით უნდა გააკეთო პასი, სხვა სიტუაციაში ბურთი დაამუშაო. თუ მოტყუებაა საჭირო, ასეც მოიქცე, ყოველთვის სხვადასხვაგვარად მოქმედებ.

სამწუხაროდ, ახლანდელი გუნდი განსხვავდება იმ "მანჩესტერ იუნაიტედისგან", რომელშიც მე ვთამაშობდი. კლუბის ხელმძღვანელებმა არჩევანი გააკეთეს, მაგრამ არ გაამართლა", - განაცხადა ნანიმ.

წყარო: dailymail