მარუან ფელაინის მიაჩნია, რომ "მანჩესტერ იუნაიტედის" გულშემატკივრებში მისი არაპოპულარულობა დევიდ მოიესთან კავშირით შეიძლება იყოს გამოწვეული.

2013 წელს სერ ალექს ფერგიუსონის შეცვლის შემდეგ მოიესის პირველი შენაძენი სწორედ ბელგიელი ფეხბურთელი აღმოჩნდა.

"იუაიტედის" გულშემატკივარს არასდროს გამოუხატავს ფელაინისადმი სიყვარული, რადგანაც მათი აზრით, მარუანის ფიზიკური სტილი კლუბის საფეხბურთო ისტორიას არ ესადაგება- და არიან ისეთებიც, ვინც ფელაინის შეცვლისას უსტვენენ.

ფელაინის კი მიაჩნია, რომ ეს მეტწილად დევიდ მოიესთან მისი კავშირით არის გამოწვეული და არა მისი სტილითა თუ თამაშით.

"ხანდახან ვამბობ, რომ იმის გამოა, დევიდ მოიესს რომ შევუერთდი, ხანდახან კი ვამბობ, რომ არა. სიმართლე კი ერთია- არ ვიცი.

ჩემს ოჯახს უფრო აღელვებს, ვიდრე მე. მე პროფესიონალი ვარ, ასე რომ, ამას უნდა გავუმკლავდე და არ მოვუსმინო. ხანდახან ეს რთულია, მაგრამ ეს ხომ ფეხბურთია და მე ხომ დიდ კლუბში ვთამაშობ. ზოგჯერ ვერ ვხვდები. რატომ მე? არ ვიცი.

მე მხოლოდ ერთი რამ ვიცი, რომ ბევრი ადამიანი ხედავს მოედანზე ჩემს შრომას და ჩემთვის ეს უფრო მნიშვნელოვანია".



ფელაინი აღნიშნავს, რომ კრიტიკა მასზე გავლენას არ ახდენს და ლუი ვან გაალის დავალებების შესრულებას განაგრძნობს, თუნდაც სხვადასხვა პოზიციაზე.

"ჩემი საუკეთესო მეგობარი მეუბნება: "ჯერ შენს თავზე იფიქრე" და მეუბნება, უფრო ეგოისტი ვიყო, მაგრამ ასეთი არ ვარ.

როცა მწვრთნელი კონკრეტულ პოზიციაზე თამაშს გთხოვს, ასეც უნდა მოიქცე. სეზონის დასაწყისში "ლივერპულის" წინააღმდეგ თავდამსხმელად თამაში მთხოვეს. ჩემზე რომ ყოფილიყო, ამ პოზიციას არ ავირჩევდი, მაგრამ ვალდებული ვიყავი, მეთამაშა და ჩვენ მატჩი მოვიგეთ. უბრალოდ უნდა გახვიდე და თავი გაართვა. როცა მწვრთნელი რაღაცის გაკეთებას მთხოვს, ვაკეთებ.

მე პროფესიონალი ვარ, კლუბისა და მწვრთნელის სამსახურში ვდგავარ. ჩემი საყვარელი პოზიცია ნომერი ექვსი ან ნომერი რვაა, მაგრამ მწვრთნელთან პრობლემა არასდროს მექნება, რადგან ჩემს სამუშაოს ვასრულებ", - განაცხადა ფელაინიმ.

წყარო: M.E.N.