2016 წლის 3 აპრილიდან "ოლდ ტრაფორდის" სამხრეთ ტრიბუნას სერ ბობი ჩარლტონის სახელი დაერქმევა. ჩარლტონი "მანჩესტერ იუნაიტედის" ისტორიაში საუკეთესო ბომბარდირია და დამსახურებულად ითვლება გუნდის ლეგენდად. ინტერვიუში კი მან "ოლდ ტრაფორდისადმი" მის დამოკიდებულებაზე ისაუბრა...

პირადად თქვენთვის რას ნიშნავს "ოლდ ტრაფორდი"?

კარგი, პირველად რომ მოვედი, 15 წლის ვიყავი. ეს დიდი ხნის წინ იყო! უბრალოდ მაგიური ადგილია. საყვარელი სტადიონია და ვინც არ უნდა დავპატიჟო, პირველად რომ აქ მოხვდებიან, აღტაცებას ვერ მალავენ. ხანდახან მატჩების შემდეგ მოედანზეც გამყავს ეს ხალხი და თვალებს არ უჯერებენ.

თქვენს პირველ ვიზიტს ვერ გაიხსენებთ?

სტადიონი ჯიმი მერფიმ მაჩვენა, როცა 15 წლის ვიყავი. სადგურზე ამიყვანა და იქიდან მანქანით წამოვედით, რადგან იმ დროს სეილში სასტუმროში ვცხოვრობდი. მითხრა: "ოლდ ტრაფორდისკენ მივდივართ, ძალიან მოგეწონება, შვილო". გავიფიქრე, რომ რაღაცას მიედ-მოედებოდა, რადგან "იუნაიტედზე" ლაპარაკი უყვარდა და რას არ ამბობდა. "სენტ ჯეიმს პარკზე" ნამყოფი ვიყავი, იმ დროს კი "ოლდ ტრაფორდი" ასეთი მნიშვნელოვანი ადგილი არ იყო ფეხბურთისთვის. მაგრამ აღმოჩნდა, რომ "ოლდ ტრაფორდი" გადასარევია.

რა როლი ითამაშა სერ მეტ ბასბიმ სტადიონის განვითარებაში?

მეტი შეერთებულ შტატებში გაემგზავრა სამწვრთნელო კურსების გასავლელად და უკან იდეით დაბრუნდა. მაშინ ის იყო ევროტურნირებზე გავდიოდით და ჩვენს რიგებში უცხოელი ფეხბურთელები პირველად გადმოდიოდნენ. ევროპული ფეხბურთისადმი ინტერესის გამო სტადიონს ყოველი მატჩის წინ ამზადებდნენ. მეტმა თქვა, რომ შტატებში ხალხი მატჩების ყურების წინ ვიტრინის უკან მიირთმევდა საჭმელს. როცა "ოლდ ტრაფორდზე" დაბრუნდა, გვითხრა: "ჩვენც ასე უნდა მოვიქცეთ". სწორედ ასე დაიწყო ყველაფერი, განსახორციელებელი ყუთებით, რომლებიც ახლა მთელ ტერიტორიაზეა გავრცელებული. მეტი იმ დროს პროგრესულად აზროვნებდა.

სტადიონს ეწოდება "ოცნების თეატრი". ამაზე რას ფიქრობთ?

ჯოფრი გრინი, ჩემი კარგი მეგობარი The Times-ის ჟურნალისტი იყო და დიდი მატჩის წინ ჩემთან ინტერვიუს ასაღებად მოვიდა. დარწმუნებული ვარ, ასე თქვა- "ეს ოცნების თეატრია", როცა "ოლდ ტრაფორდზე" ლაპარაკობდა- დიდებული ადამიანი იყო, მაგრამ ოდნავ რომანტიკოსი! მერე კი ვიღაცამ ეს დაიმახსოვრა და სტადიონთან მიმართებაში გამოიყენა. ძალიან სასიამოვნოა, რადგან ეს მართლაც ოცნების თეატრია. ზღაპრულია, როცა ხედავ, როგორ მოდის ხალხი და მაშინვე მთლიანად ყველაფერს იღებს.

ყოველთვის, როცა სტადიონზე შევდივართ, ისტორიის შეგრძნება გვეუფლება. ახლა ეს შეცვლილია?

რაღაცას ყოველთვის გახსენებს. რაც უფრო ასაკოვანი ხარ, მით მეტად ფიქრობ შესვლისას. მრცხვენია, რომ ყველა მატჩი არ მახსენდება. დღესდღეობით მოედანი უზადოა, მაგრამ ყოველთვის ასე არ იყო. ნახევრად ხელოვნური და ნახევრად ბუნებრივი ბალახია, ეს კი ნიშნავს, რომ სეზონის ბოლომდე გაძლებს და მომდევნოს დასაწყისისთვისაც ასეთ მდგომარეობაში იქნება".

წყარო: manutd.com