ანდრეას პერეირას იმედი აქვს, რომ ბრაზილიის 23-წლამდელთა ნაკრების რიგებში ოლიმპიურ თამაშებზე მიიღებს მონაწილეობას და ამაში ამხანაგური მატჩები დაეხმარება.

"მანჩესტერ იუნაიტედის" ახალგაზრდა ფეხბურთელი ნიგერიასთან მატჩში მოგვიანებით ჩაერთო თამაშში, მისი გუნდი კი 0-1 დამარცხდა. კვირას ბრაზილიელები სამხრეთ აფრიკას დაუპირისპირდებიან და პერეირას კიდევ ერთი შანსი ექნება, აგვისტოს მთავარი მოვლენის მონაწილე გახდეს.

მიუხედავად იმისა, რომ პერეირა ბელგიაში დაიბადა, მისი ოჯახის წევრები ბრაზილიელები არიან და მასაც სურს, რომ ცნობილი ყვითელი მაისური ატაროს.

"ყოველთვის ბრაზილიას ვგულშემატკივრობდი. ყოველთვის. თამაშების ყურებისას ყველა ბრაზილიის მაისურს იცვამს- ეს განსაკუთრებული მომენტია.

სპორტისადმი ასეთ ლტოვლას იმიტომ განიცდი, რომ როცა ახალგაზრდა ხარ, ოჯახში ყველას მოსწონს ფეხბურთი. პირველი, რასაც პატარაობისას გაძლევენ, ფეხბურთია. შემდეგი შენი საყვარელი კლუბის მაისურია. ქუჩაში ყველა ფეხბურთს თამაშობს და საერთოდ, ფეხბურთი ბრაზილიაში ყველაფერია. სულაც არ არის საჭირო, იყო მდიდარი ან ღარიბი. მნიშვნელობა არ აქვს, ვინ ხარ- თეთრკანიანი თუ შავკანიანი. თამაშობ ფეხბურთს, ყველა ერთად და ეს მართლაც მშვენიერია", - განაცხადა პერეირამ.

ოლიმპიური ტურნირი ძალიან მნიშვნელოვანი იქნება ბრაზილიისთვის, რადგანაც 2012 წელს ფინალში მექსიკასთან დამარცხების შედეგად გუნდმა მესამე ვერცხლის მედალი მოიპოვა. 1996 და 2008 წლებში კი ბრინჯაოს მედალის მფლობელები გახდნენ, ახლა კი დროა, ოქროს მედალს დაეუფლოს.

"ოლიმპიადაზე თამაში ოცნებაა, ამიტომ იმედი მაქვს, რომ ვითამაშებ. იქ მოსახვედრად ბევრს ვშრომობ და იმედიც მაქვს. ეს 23-წლამდელთა გუნდია, მე კი 20 წლის ვარ.

განსაკუთრებული იქნება, რადგან ბრაზილიას ფეხბურთში არასდროს მოუგია ოლიმპიადის ოქროს მედალი. შესანიშნავი იქნება, თუკი მის მოგებას პირველად ჩვენ შევძლებთ. არგენტინას უკვე მოგებული აქვს, ასე რომ, მათ უნდა გავუთანაბრდეთ.

ჩემი მთავარი მიზანი ბრაზილიის პირველ გუნდში თამაში და მსოფლიო ჩემპიონატის მოგებაა. ეს ჩემი უდიდესი ოცნებაა. ვიცი, "იუნაიტედს" ამ ოცნების ახდენაში დახმარება შეუძლია და იმედი მაქვს, ჩვენ ერთმანეთს დავეხმარებით".

წყარო: manutd.com