ლუი ვან გაალმა განაცხადა, რომ ჯერ ძალიან ადრეა ბასტიან შვაინშტაიგერის სასტარტო შემადგენლობაში დაყენება, ამიტომ გერმანელი "ლივერპულთან" მატჩს სათადარიგოთა სკამზე დაიწყებს.

ორთვიანი პაუზის შემდეგ ნახევარმცველი "ლივერპულთან" ევროპის ლიგის პირველ მატჩში დაუბრუნდა მოედანს, თავისი მეორე შეხვედრა კი ინგლისის თასზე "ვესტ ჰემის" წინააღმდეგ ჩაატარა.

მას შემდეგ, რაც ვან გაალმა დაადასტურა, რომ ბასტიან შვაინშტაიგერი სასტარტო შემადგენლობაში არ იქნება, ასევე განაცხადა, რომ ეშლი იანგი და კამერონ ბორტუიკ-ჯექსონი "ლივერპულთან" მატჩის განაცხადში საერთოდ ვერ მოხვდებიან, მიუხედავად იმისა, რომ ორივე მათგანმა განაახლა ვარჯიში. მზად არ არის ანტონიო ვალენსიაც, რომელმაც 21-წლამდელთა გუნდში გასულ კვირაში ითამაშა.

"ისინი ახლა ჩვენთან ერთად ვარჯიშობენ, მაგრამ უფრო მეტია საჭირო, ვიდრე ერთი ან ორი სავარჯიშო სესია. მაგალითად, იანგი და ვალენსია რამდენიმე თვეა ვერ ახერხებენ თამაშს, ამიტომაც არ არის ადვილი დაბრუნება და ამ დონის რიტმთან ადაპტირება.

დიახ, მათთვის ჯერ ძალიან ადრეა. სასტარტო შემადგენლობაში დაყენება ჯერ ადრეა შვაინშტაიგერისთვისაც. მან ითამაშა ორჯერ, 10 და 15 წუთი, იქნებ, 45 ან 30 წუთი ითამაშოს, მოედანზე შექმნილ სიტუაციაზე იქნება დამოკიდებული. წინასწარ ვერ გეტყვით, მაგრამ ამის გაკეთებას, რა თქმა უნდა, ვეცდები. "ვესტ ჰემ იუნაიტედთან" მატჩში მან უდიდესი გავლენა მოახდინა და ვფიქრობ, გოლშიც მიუძღვის წვლილი. მაგრამ, ჰო, უნდა გავითვალისწინო ის ფაქტი, რომ ტრავმირებულები არიან, ამჟამად არ დაბრუნებულან, მხოლოდ ერთი სავარჯიშო სესია ჩაატარეს ჩვენთან ერთად", - განაცხადა მწვრთნელმა.

ლუკ შოუ, ფილ ჯონსი, უილ კინი და უეინ რუნი დიდი ხანია ტრავმირებულნი არიან, თუმცა ამ უკანასკნელმა განაცხადა, რომ სანაკრებო მატჩების შემდეგ დაბრუნებას გეგმავს.

თავის პრესკონფერენციაზე მწვრთნელმა ასევე დაამატა: "ეშლი იანგი ორი კვირაა უქმობს, ბორტუიკ-ჯექსონი კი სხვა თემაა. ის სამი კვირა ვერ ახერხებდა თამაშს, ე.ი. განსხვავებული მდგომარეობა გვაქვს.

ნებისმიერი ფეხბურთელისთვის რთულია ტრავმის შემდეგ დაბრუნება და მაგალითად მომყავს მარკოს როხო, რომელიც გამონაკლისია, რადგან სხვა მცველი არ მყავდა, ამიტომ იძულებული ვიყავი, პირდაპირ პირველ გუნდში მეთამაშებინა.

წვალობდა, როგორც ნახეთ, მე მას 10, 20, 50, 70 და შემდეგ, ბოლოს, 90 წუთს ვაძლევდი, მაგრამ ახლა ძალიან გადაღლილია და შეიძლება ხვალაც ითამაშოს. ადვილი არ არის მისთვის, ვინც ვერ თამაშობდა ან ოპერაცია გაიკეთა, მაგრამ ეს არის დიდი გარდასახვა ასეთი ტიპის ფეხბურთელებისთვის.

იგივე მოხდება ლუკ შოუსა და უეინ რუნის შემთხვევაში, როცა ის დაბრუნება, რადგანაც უკვე სამი კვირაა ვერ ახერხებს თამაშს. უნდა დაელოდო სავარჯიშო სესიას და ნახო, შეძლებს, ითამაშოს სრული მატჩი თუ მხოლოდ 20 წუთი, ეს კი რთულია".

წყარო: manutd.com