რადამელ ფალკაო აღნიშნავს, რომ "მანჩესტერ იუნაიტედში" ლუი ვან გაალისგან უფრო მეტი სათამაშო დროის მიღებას ელოდა.

30 წლის ფალკაო "ოლდ ტრაფორდზე" სატრანსფერო ფანჯრის ბოლო დღეს გადაბარგდა "მონაკოდან" და თავის სადებიუტო შეხვედრაში საგოლე პასი გაუკეთა რობინ ვან პერსის, თავის მეოთხე მატჩში კი "ევერტონს" გამარჯვების გოლი გაუტანა.

თუმცა, იმის ფონზე, რომ ვან გაალი ერთი თავდამსხმელით ათამაშებდა გუნდს, ფალკაო უეინ რუნისა და ვან პერსის კონკურენციას ვერ უწევდა, რის შედეგადაც მხოლოდ 17 მატჩის ჩატარება და 4 გოლის გატანა მოახერხა.

ფრანგული კლუბიდან იჯარის წესით "იუნაიტედში" გადასვლის შემდეგ კოლუმბიელი "წითელმა ეშმაკებმა" არ გამოისყიდეს, რადამელი კი გადაბარგდა "ჩელსიში", სადაც 31 ოქტომბრის შემდეგ არ უთამაშია.

"მანჩესტერში ყველაფერი რთულად იყო. ყველა ხედავდა, რომ იქმნებოდა სიტუაცია, როცა ერთ დღეს ვთამაშობდი, მეორე დღეს - არა, შედეგად არასტაბილურობას შეეწყო ხელი.

დღეს 60 წუთს მაძლევდნენ, მერე 45, მერე 20 - ეს არასტაბილურობას უწყობს ხელს და ხანდახან არც კი იცი, რა ადგილი გიკავია ან რას ანიჭებს მწვრთნელი ფეხბურთში უპირატესობას.

რთული იყო. რეგულარულად უნდა მეთამაშა. მუხლის ტრავმის შემდეგ გადავედი "მანჩესტერ იუნაიტედში", სადაც დაიწყო ახალი პროცესი ახალი ფეხბურთელებით იმ მწვრთნელის წასვლის შემდეგ, რომელიც 25 წელი მუშაობდა, მე კი ვერ მივიღე ის, რასაც ველოდი", - განაცხადა ფალკაომ.

წყარო: M.E.N.