"მანჩესტერ იუნაიტედმა" "ვესტ ჰემთან" მატჩში ანგარიშში ჩამორჩენის შემდეგ 1-1 ითამაშა, გუნდის კაპიტანი მაიკლ კერიკი კი ფეხბურთელთა თავდადებითა და გუნდური სულისკვეთებით მოხიბლულია.

შეხვედრის 68-ე წუთზე დიმიტრი პაიემ საჯარიმო დარტყმიდან გახსნა ანგარიში, ლუი ვან გაალის შეგირდებმა ენტონი მარსიალის გოლისა და ანდერ ერერას საგოლე გადაცემის შედეგად ანგარიში გაათანაბრეს.

"აპტონ პარკზე" გასამართი გამეორებითი შეხვედრა გადაწყვეტს, რომელი გუნდი ითამაშებს მომდევნო თვეში "უემბლიზე" ნახევარფინალს, კერიკი ფიქრობს, რომ მის გუნდს ამის ყოველგვარი საფუძველი აქვს.

"დასასრულს ფრე მივიღეთ, მაგრამ ჩვენ მოსაგებად წავედით და მატჩში გამარჯვება ნამდვილად გვინდოდა. ყოველთვის ვგრძნობდი, რომ შევძლებდით, მაგრამ გამარჯვების გოლი ვერაფრით გავიტანეთ.

რა თქმა უნდა, შვებას ვგრძნობთ, დიდი შესაძლებლობაა. ეს ინგლისის თასია, რომელზეც შორს გასვლა გვინდა. მეორე ტაიმში 1-0 ანგარიშიდან თავდაღწევა და შემდეგ მოსაგებად წასვლა პოზიტივია.

პაიემ დიდებულად შეასრულა ჯარიმა, მაგრამ ჩვენ ხასიათი გამოვავლინეთ და გამარჯვებისკენ ვისწრაფოდით - უბრალოდ, ვერ მივიღეთ. ზეწოლას ვახდენდით და ალბათ, მეტი შანსიც შევქმენით. ბოლო პასი არ გამოგვდიოდა და მეკარესაც საკმარისი სამუშაო ვერ მივეცით.

ეს ინგლისის თასია, საჯარიმოში ბევრი რამ ხდებოდა და ვფიქრობ, საკმაოდ კარგი მატჩი გამოვიდა. რაც შეეხება პენალტებს, მათ ან გინიშნავენ, ან არა, ასე რომ, თითო გოლი ორივე კარში სამართლიანი შედეგია", - განაცხადა კერიკმა.

"იუნაიტედი" "ვესტ ჰემთან" მატჩს ევროპის ლიგაზე "ლივერპულთან" დამარცხებით შეხვდა. ევროპის რანგით მეორე ტურნირის 1/8 ფინალური ეტაპის საპასუხო მატჩი ხუთშაბათს "ოლდ ტრაფორდზე" გაიმართება, მაგრამ კერიკი აცხადებს, რომ ფეხბურთელები მხოლოდ სათასო მატჩზე ფიქრობდნენ.

"ლივერპულთან" მატჩი დღეს არავის ახსოვდა. შეხვედრაში გასვლისას ამას კარგად ვაცნობიერებდით და ამ ტურნირზე შორს წასვლა გვსურდა. ჯერ არ მოგვიხერხებია, მაგრამ ამისთვის სხვა დროს საბრძოლველად ვიცოცხლებთ".

წყარო: manutd.com