"მანჩესტერ იუნაიტედის" ნახევარმცველი მარუან ფელაინი, შესაძლოა, სამმატჩიანი დისკვალიფიკაციით დაისაჯოს იმის გამო, რომ ევროპის ლიგის შეხვედრაში "ლივერპულის" ნახევარმცველ ემრე ჯანს სახეში იდაყვი ჩაარტყა.

ისტორიულ მეტოქეთა შორის ევროპის მასშტაბით გამართული პირველი შეხვედრა "ლივერპულის" გამარჯვებით 2-0 დასრულდა. გარდა იმისა, რომ ვან გაალის გუნდმა ცუდ შედეგს მიაღწია, მომდევნო სამ ევროპულ მატჩში მას, შეიძლება, ბელგიელი ვერ დაეხმაროს.

აღნიშნული ინციდენტი მატჩის მიწურულს მოხდა და მთავარმა მსაჯმა კარლოს ველასკო კარბალიომ ვერ შეამჩნია, თუმცა უეფა-ს შეუძლია, ფელაინის მოგვიანებით გამოუტანოს განაჩენი.

"მსაჯს რომ ეს დაენახა, ალბათ, წითელ ბარათს ამოიღებდა, - განაცხადა ფიფა-ს ყოფილმა არბიტრმა, ჰოვარდ უებმა. - უეფა ალბათ ამ ეპიზოდის დაწვრილებით გადახედვას ისურვებს, რადგანაც ნათლად ჩანს, რომ ეს აშკარა უხეშობა იყო, თუმცა ექვსი მსაჯიდან ვერცერთმა ვერ შენიშნა".

იურგენ კლოპი: "იდაყვის შესახებ არაფერი უნდა ვთქვა, მაგრამ მე დავინახე. თუმცა მე მსაჯი არ ვარ. რაც გინდათ ის დაწერეთ, მაგრამ არა ჩემი სახელით".



წყარო: bbc