"მანჩესტერ იუნაიტედი" ევროპის ლიგის შეხვედრაში "ლივერპულთან" 2-0 დამარცხდა. ლუი ვან გაალმა მატჩის შემდეგ მნიშვნელოვან საკითხებზე ისაუბრა.

მატჩის აღწერა: "უნდა ვთქვა, რომ "ლივერპულმა" შექმნა ატმოსფერო, რომელიც ფანტასტიკურია. ძალიან კარგად ითამაშეს; პირველ ტაიმში მათ ზეწოლას ვერ ვუმკლავდებოდით. მომენტები შექმნეს, მაგრამ დავიდ დე ხეა ფანტასტიკური იყო. ჩვენ დაგვინიშნეს პენალტი და ჩემი აზრით, საკამათო იყო. მეორე ტაიმში სქემა შევცვალეთ და მატჩზე უფრო მეტი კონტროლი მოვიპოვეთ, მაგრამ შანსებს მაინც ვერ ვქმნიდით. მორიგი საკამათო გოლი გაგვიტანეს და ახლა გაცილებით რთული მდგომარეობაა, რადგან 2-0 ძალიან ცუდი შედეგია".

ზეწოლა მოწინააღმდეგისგან: "ვხედავდი, რომ "ლივერპულის" მაღალ ზეწოლას ვერ ვუმკლავდებოდით. ჩემთვის გასაკვირი იყო, რომ ვერ ვუმკლავდებოდით, რადგან ამას ისევე აკეთებდნენ, როგორც წელს მათთან მოგებულ გასვლით მატჩში. თავიდან ისინი პროვოცირებდნენ, რომ დავიდ დე ხეას ბურთი დეილი ბლინდისთვის ან კრის სმოლინგისთვის მიეცა, შემდეგ კი მაღალ ზეწოლას ახდენდნენ და ამას თავი ვერ გავართვით. მათ სტადიონის შიგნითაც გაზარდეს ატმოსფერო. დიდებული მომენტები ჰქონდათ, მაგრამ ჩვენ ძალიან კარგი მეკარე გვყავს, რომელიც გუნდის ნაწილია და რომლის დახმარებითაც დავრჩით მატჩში. შემდეგ საკამათო პენალტი დაგვინიშნეს და ანგარიში 1-0 გახდა."

სტარიჯის მიერ გარდასახული "ლივერპულის" პენალტი: "მსაჯი ვერ დაინახავდა საჯარიმოში მემფისის მხრიდან წესების დარღვევას, რადგან მან საჯარიმოს გარეთ დაარღვია, ხოლო კლაინი შიგნით წაიქცა. საქმე იმაში არ არის, რომ მემფისმა იგი წააქცია, რთული ის არის, რომ ერთ წამში ამას ვერ დაინახავ. როცა პენალტს ნიშნავ, დარწმუნებული უნდა იყო; დარღვევა მოხდა გარეთ თუ შიგნით, დაზუსტებით არ ვიცი. ჩემთვის საკამათო პენალტია, თუმცა "ლივერპულმა" გოლი დაიმსახურა".

მოთამაშეებზე ატმოსფერომ გავლენა მოახდინა? "არა, ზეწოლა არ მომდინარეობს მაყურებლისგან, ზეწოლას მოედანზე ფეხბურთელები ახდენენ. ისინი ძალიან მაღალი დონის პრესინგს მიმართავდნენ და "ლივერპულის" მხრიდან ეს ძალიან კარგი იყო. უკვე ვთქვი, რომ ვერ ვუმკლავდებოდით მოედანზე ფეხბურთელთა ზეწოლას, რომლებიც ბურთზე პრესინგს ყოველთვის ახდენდნენ. რომელ ფეხბურთელსაც უნდა ჰქონოდა ბურთი, ისინი პრესინგს ახდენდნენ და ეს მეტისმეტი იყო. მაგრამ მეორე ტაიმში ჩვენც ამას ვაკეთებდით და მათაც გაუჭირდათ".

მეორე ტაიმში თამაში: "ლივერპული" უკეთესი გუნდი იყო პირველ ტაიმში, მაგრამ მეორე ტაიმში ჩვენ უკეთ ვითამაშეთ, ვიდრე მანამდე. მეორე ნახევარში "ლივერპულივით" ზეწოლას ვცდილობდით. სქემა შევცვალეთ და გამოჩნდა, რომ "ლივერპულს" სირთულეები დაეწყო, მაგრამ ბევრი მომენტი მაინც ვერ შევქმენით, ალბათ, მხოლოდ ორი ან სამი. მათგან საუკეთესო ფელაინის თავური იყო. თუმცა მორიგი საკამათო გოლი გავუშვით. ვფიქრობ, ჰენდერსონი თამაშგარეში იყო".

"ლივერპულის" მეორე გოლი, რომელიც ფირმინომ გაიტანა: "რამდენადაც საკამათოა მათი გოლები, იმდენად დაიმსახურეს ისინი. ვიდეოგანმეორება ვნახე და ვფიქრობ, ბიჭი, რომელიც საჯარიმოს გარედან იძლევა პასს, უკვე თამაშგარეშია. როცა მსაჯი ზუსტად ხედავს პენალტს, ასევე ზუსტად უნდა დაინახოს თამაშგარე. მაგრამ ჩვენ ეს გოლიც გავუშვით, ამიტომაც ძალიან საზიზღარი გრძნობები მაქვს".

კარში ერთადერთი დარტყმა სამწუხაროა: "მართალი ხართ. ამას ვერ უარვყოფ. არ ვფიქრობ, რომ მესამე ან მეოთხე ფაზაში კრეატიულები ვიყავით. მაგრამ ეს "ლივერპულის" დაცვის დამსახურებაა და ამის გამო ისინი უნდა შეაქოთ. ძალიან უნდა გავუმჯობესდეთ იმისთვის, რომ უფრო მეტი გოლი შევქმნათ. კარგი, ერთი დარტყმა, მაგრამ თავურიც ხომ გვქონდა, კარში არ წასულა, მაგრამ კარისკენ წავიდა".

ფელაინისა და ემრე ჯანის დაპირისპირება: "უნდა ვთქვა, ფელაინი მოედანზე ერთ-ერთი საუკეთესო ფეხბურთელი იყო. ძალიან ვწუხვარ, რომ ასეთი შეცდომა დაუშვა (ჯანზე წესების დარღვევა, რომელიც მსაჯმა ვერ შეამჩნია). ეს მომენტი არ მინახავს".

საპასუხო მატჩის წინა მდგომარეობა: "ყველაფრის უნდა გჯეროდეს. ჩვენც შეგვიძლია შევქმნათ ატმოსფერო, რომელიც "ლივერპულმა" თავისი ფანებით შექმნა. და მერე ყველაფერია შესაძლებელი. მათზე ზეწოლა უნდა მოვახდინოთ. მეორე ტაიმში ამას ვაკეთებდით, მაგრამ არა პირველში.

წყარო: manutd.com