მაიკლ კერიკი არ ფიქრობს, რომ "ვესტ ბრომთან" დამარცხების შემდეგ პრემიერ ლიგის პირველ ოთხეულში მოხვედრა "მანჩესტერ იუნაიტედს" აღარ შეუძლია.

"ჰოთორნსზე" წაგებული მატჩის შედეგად ლუი ვან გაალის შეგირდები 3 ქულით ჩამორჩებიან მეოთხე ადგილს, რომელზეც "მანჩესტერ სიტი" იმყოფება, თუმცა მანუელ პელეგრინის გუნდს ერთი მატჩით ნაკლები აქვს ჩასატარები.

კერიკი დარწმუნებულია, რომ ოთხეულში მოხვედრა კვლავ შესაძლებელია, მაგრამ ამისთვის ქულების დაკარგვა დაუშვებელია.

"ოთხეული მიუწვდომელი არ არის. უბრალოდ გამარჯვებების მოპოვება უნდა განვაგრძოთ, სულ ეს არის. სათქმელად ადვილია, მაგრამ უნდა შევძლოთ. წინ დიდი მატჩები გვაქვს, რომელთათვის მზად უნდა ვიყოთ", - განაცხადა კერიკმა.

ყველა ტურნირზე მოპოვებული ზედიზედ 4 გამარჯვების შემდეგ 34 წლის ფეხბურთელი "ჰოთორნსზე" განცდილი უიღბლობის შესახებ საუბრობს და მატას წითელ ბარათს გადამწყვეტად მიიჩნევს.

"გვინდოდა, ის ფორმა შეგვენარჩუნებინა, რომელიც ბოლო დროს ვაჩვენეთ. ძალიან სამწუხაროა. აქ ნებისმიერს უჭირს თამაში, მაგრამ ფეხბურთელის დაკარგვა ყველაფერს უფრო ართულებს. მეორე ტაიმში ერთი შანსი ჰქონდათ და გაიტანეს.

წითელმა ბარათმა თამაში შეცვალა, რადგან შეტევაში ერთით ნაკლები მოთამაშე გვყავდა, რამაც ჩვენზე გავლენა მოახდინა. ვფიქრობ, მეორე ტაიმში უფრო კომფორტულად ვგრძნობდით თავს, მაგრამ დასასრულს ეს სხვაობა შეიმჩნეოდა.

მოხდა ის, რაც მოხდა. მეორე ყვითელი ბარათი დავინახე, ამაზე კარგი შეხედულება არ მაქვს. მატას უნდა ჰკითხოთ, უღალატა გუნდს თუ არა", - დაასრულა ინგლისელმა.

წყარო: goal.com