გილერმო ვარელა "მანჩესტერ იუნაიტედის" პირველ გუნდში ყოფნით კმაყოფილია და აღნიშნავს, რომ გულშემატკივართა მხრიდან მისდამი რწმენა მას დამატებით მოტივაციას აძლევს.

ურუგვაელი მცველი კარგ ფორმაში იმყოფება და "შრუსბერის", "მიდტიულანდის", "არსენალისა" და "უოტფორდის" წინააღმდეგ მოპოვებულ გამარჯვებებში თავისი როლი შეასრულა.

"ვფიქრობ, ბოლო ოთხმა მატჩმა აჩვენა ცვლილებები, რომელიც გუნდში ბოლო რამდენიმე თვის განმავლობაში მოხდა. ნათელია, რომ სეზონის მაჟორულ ნოტაზე დასრულება გვსურს.

რა თქმა უნდა, ძალიან ბედნიერი ვარ გუნდში ზედიზედ ოთხი მატჩის ჩატარებითა და 4 გამარჯვებითაც. უდიდეს სიამაყეს ვგრძნობ ისეთ გუნდში თამაშის გამო, როგორიც "მანჩესტერ იუნაიტედია". ვფიქრობ, მნიშვნელოვანი აქ ის არის, რომ შრომას ვაგრძელებთ, მეც მინდა შრომის გაგრძელება, რათა გუნდში რეგულარული ადგილი მოვიპოვო, რომ დროთა განმავლობაში 50, 100 ან 200-მატჩიან ნიშნულს მივაღწიო", - განაცხადა ურუგვაელმა.

ვარელას თამაშს სოციალურ ქსელსა და პრესაში არაერთი დადებითი გამოხმაურება მოჰყვა.

"უნდა ვთქვა, რომ მხოლოდ ახლახან გავაცნობიერე, თუ რამდენად ახდენს გავლენას ადამიანზე საზოგადოების მხრიდან სიყვარული. გულშემატკივართა შორის ძალიან პოპულარული ვარ და მინდა ვისაუბრო ეფექტზე, რომელიც ჩემზე მოახდინა. მნიშვნელობას მხოლოდ მაშინ აცნობიერებ, როცა იღებ და მინდა, მადლობა გადავუხადო ყველას, ვინც მგულშემატკივრობს, ეს წინსვლაში მეხმარება და მოედანზე საუკეთესოობისთვის მოტივაციას მაძლევს".

როცა ჰკითხეს, თავისი თავი შემადგენლობის მუდმივ წევრად წარმოედგინა თუ არა, ვარელამ უპასუხა: "არა, ნამდვილად არა. ვფიქრობ, ჩემი საქმე დღითი დღე შრომაა, რათა მწვრთნელს ვუჩვენო, რომ პირველი გუნდის შემადგენლობაში ადგილის რეგულარულად მიღების ღირსი ვარ. ვერ ვიტყვი, რომ ახლა ავტომატიური არჩევანი ვარ, ეს გადაჭარბებული იქნებოდა".

კვირას "ჰოუთორნსზე" გასამართი შეხვედრა ვან გაალის შეგირდების მორიგი მატჩი იქნება, ვარელა კი ამბობს, რომ გუნდი საბრძოლველად მზად არის.

"გადაღლილი საუკეთესო სიტყვა იქნება ჩემი მდგომარეობის აღსაწერად. ფეხებს ბევრი დატვირთვა მოუხდა. ახლა აღდგენითი და გამაჯანსაღებელი პერიოდი გვაქვს, ამ მხრივ კარგად ვშრომობთ და ნუ დაგვავიწყდება, რომ კვირამდე ზედმეტი დასვენების დღეც გვაქვს. იმედი მაქვს, ეს ფორმის პოვნაში დაგვეხმარება", - დაასრულა მცველმა.

წყარო: manutd.com