ანდერ ერერა აცხადებს, რომ იგი და მისი თანაგუნდელები უკანასკნელ შესაძლებელ მომენტამდე იბრძოლებენ პრემიერ ლიგის ოთხეულში მოსახვედრად.

"მანჩესტერ იუნაიტედმა" რთულ მატჩში დაამარცხა "უოტფორდი" პრემიერ ლიგის ტურში, რომელშიც "არსენალმა", "ტოტენჰემმა" და "მანჩესტერ სიტიმ" 3-3 ქულა დაკარგეს. შედეგად, ამჟამად "იუნაიტედი" მხოლოდ ბურთების უარესი სხვაობის გამო ვერ არის მეოთხე ადგილზე, თუმცა "სიტის" ერთი მატჩით ნაკლები აქვს ჩატარებული.

მატჩის შემდეგ "იუნაიტედის" ტელევიზიასთან საუბრისას ერერამ განაცხადა, რომ ფეხბურთელებმა კვლავ ირწმუნეს მომდევნო სეზონში ჩემპიონთა ლიგაზე მოხვედრის შესაძლებლობის: "გულახდილები უნდა ვიყოთ, კარგად არ გვითამაშია. უნდა ვისწავლოთ ისეთი მატჩების მოგება, რომლებიც ცუდ ამინდში იმართება.

მატჩის დასაწყისში ბურთით ცუდად ვთამაშობდით და მეტოქეს რამდენიმე შანსი შევაქმნევინეთ, მაგრამ თუკი გვსურს ბრძოლა ყველაფრისთვის, მათ შორის ოთხეულისთვის, ასეთი მატჩები უნდა მოვიგოთ. ვაჩვენებთ სწრაფვას იმისკენ, რომ ბოლომდე ბრძოლა გვსურს და მაშინაც კი, როცა კარგად ვერ ვთამაშობთ, გამარჯვების გვჯერა".

"ოლდ ტრაფორდზე" გამარჯვების შემდეგ ნოემბრის შემდეგ "იუნაიტედმა" პირველად მოიგო პრემიერ ლიგის ზედიზედ ორი მატჩი. "წითლების" მომდევნო მეტოქე კვირას ვესტ ბრომი" იქნება.

"პრემიერ ლიგაში ვერასდროს გამოიცნობ, რა მოხდება მომდევნო მატჩში. უნდა ვიმოქმედოთ გონივრულად და უნდა ვიყოთ თავმდაბლები, ამჯერად ჩავდივართ "ვესტ ბრომში", რომელმაც ჩემპიონატის ლიდერს ფრე ეთამაშა, ასე რომ, ადვილი არ იქნება. მაგრამ როცა "მანჩესტერ იუნაიტედი" ხარ, ასეთი მატჩების მოგება უნდა ისწავლო.

რამდენიმე კვირის წინ ცუდად ვთამაშობდით და წავაგეთ ის შეხვედრები, რომლებიც არ უნდა წაგვეგო. ორი გამოსავალი გვქონდა: ან დანებება, ან ბოლომდე ბრძოლა, ჩვენ კი სწორედ ამის გაკეთება გვინდა.

ოთხეულში მოხვედრა გვსურს, მაგრამ ეს არ იქნება ადვილი, რადგან ჩვენი კონკურენტებიც კარგი მეტოქეები არიან, მაგრამ ჩვენ "მანჩესტერ იუნაიტედი" ვართ და ბოლომდე ვიბრძოლებთ, რადგან ჯერ კიდევ ბევრი რამ გვაქვს მოსაგები - სამი ტურნირი.

ვფიქრობ, ჩვენ ბოლომდე ვიბრძოლებთ და თუ ჩვენს მეტოქეებს ჩვენი დამარცხება სურთ, მათაც ბოლომდე ბრძოლა მოუწევთ".

წყარო: manutd.com