"მანჩესტერ იუნაიტედის" მთავარმა მწვრთნელმა, ლუი ვან გაალმა განაცხადა, რომ ენტონი მარსიალი და მატეო დარმიანი "უოტფორდთან" მატჩში მონაწილეობისთვის მზად იქნებიან.

ფრანგმა ტრავმა ევროპის ლიგის მატჩამდე მიიღო და მისი ადგილი მარკუს რეშფორდმა დაიკავა. კონკურენციის მოგება მოუწევს გილერმო ვარელასთან მატეო დარმიანსაც.

კრის სმოლინგთან დაკავშირებით გადაწყვეტილებას მოგვიანებით მიიღებენ.

"ვგონებ, მარტში ფეხბურთელები დაგვიბრუნდებიან. გვჭირდება ეს მოთამაშეები, რადგან ძალიან გადატვირთული გრაფიკი გვაქვს.

მარსიალს თამაში შეუძლია, დარმიანსაც. შესაძლოა, სმოლინგმაც შეძლოს. უნდა მოვიცადოთ ხვალამდე და ვნახოთ".

მაიკლ კერიკმა ცენტრალური მცველის პოზიციაზე გადაინაცვლა დეილი ბლინდის პარტნიორად, რადგანაც მარკოს როხო და სმოლინგი ტრავმირებულები არიან.

"ფეხბურთელებს უნდა მოვუფრთხილდეთ. უკვე ნახეთ, როგორ მოვიქეცი მარკოს როხოს შემთხვევაში - 20 წუთი და მეორედ, 60 წუთი, თუმცა არ მიუღწევია ამ დრომდე. ასე რომ, ადვილი არ არის. მეორე გუნდში თამაშიც გამოსავალია.

როხოს ჩაარტყეს. ბევრ ფეხბურთელს ურტყამენ, მაგრამ მომდევნო მატჩს მაინც ატარებენ".

"იუნაიტედი" ხვალ ზედიზედ მეოთხე გამარჯვების მოპოვებას ეცდება და ამის ფონზე გუნდს ტრავმებთან დაკავშირებული პოზიტიური ამბები აქვს.

"ფელაინი და ვალენსია პირველები არიან, ვინც დაბრუნდებიან. გარდა, რა თქმა უნდა, მარსიალის, სმოლინგისა და დარმიანისა - ისინი ბრუნდებიან, ალბათ, ხვალვე. ეს იმაზეა დამოკიდებული, როგორ იგრძნობენ თავს ხვალ, მაგრამ შანსი არსებობს იმისა, რომ ამ სამი ფეხბურთელიდან ერთ-ერთმა ითამაშოს.

ფელაინი გუნდური ვარჯიშის ბოლო ნაბიჯზე უნდა დაბრუნდეს, ვალენსიამ დღეს ჯგუფთან ერთად ივარჯიშა, ასე რომ, ბრუნდებიან. რუნი ჯერ კიდევ დაშავებულია".

წყარო: manutd.com