"მანჩესტერ იუნაიტედის" აღმასრულებელმა დირექტორმა, ედ ვუდვორდმა კლუბის აკადემიის სტრუქტურაში ცვლილებების შეტანის პირობა დადო და განაცხადა, რომ კლუბი შესაბამის განცხადებას უახლოეს დროში გააკეთებს.

დაახლოებით ერთი წელიწადი გავიდა მას შემდეგ, რაც ბრაიან მაკკლერმა აკადემიის დირექტორის თანამდებობიდან გადადგომისა და შოტლანდიის საფეხბურთო ასოციაციაში გადასვლის შესახებ განაცხადა, "იუნაიტედმა" კი მისი შემცვლელი ვერ იპოვა. თუმცა ვუდვორდის თქმით, ახალი სტრუქტურის ფორმირება დასრულებულია.

"აკადემია ჩვენი კლუბის გულია. ახალგაზრდებისთვის შანსის მიცემა - ეს ჩვენი კლუბის ფილოსოფიის, ჩვენი დნმ-ის ნაწილია. გასულ წელს ბრაიან მაკკლერს დავემშვიდობეთ და ამით სარგებლობა გადავწყვიტეთ, რათა აკადემიის რესტრუქტურიზაცია მოგვეხდინა. ახლა ეს პროცესი დასრულდა და ძალიან მალე მოხდება მნიშვნელოვანი ცვლილებები. უახლოეს დღეებში აუცილებელ განცხადებას გავაკეთებთ.

ჩვენი წამყვანი პოზიციები ამ მხრივ ჯერ კიდევ მყარია. ჩვენ შეუდარებელი მაჩვენებლები გვაქვს ახალგაზრდების განვითარების მხრივ და ჯერჯერობით ვერცერთი კლუბი, მით უმეტეს ინგლისური, ვერ შეგვედრება. ჩვენი ლიფტი, რომელიც აღზრდილებს პირველ გუნდამდე მიმავალ ყოველ საფეხურზე ატარებს, სერიოზულად აჭარბებს სისტემას, რომელიც რამდენიმე ჩვენს კონკურენტს აქვს", - განაცხადა ვუდვორდმა.

წყარო: M.E.N.