ანდერ ერერამ აღნიშნა, რომ რცხვენია, როცა "მანჩესტერ იუნაიტედის" გოლების აღნიშვნის ვიდეოს მომდევნო დღეს უყურებს, მაგრამ ემოციას ვერ იკავებს, როცა გუნდს მნიშვნელოვან მატჩში გამარჯვების გოლი გააქვს.

ესპანელი ერთადერთი ფეხბურთელი არ არის, რომელიც გულშემატკივარს გამორჩეული მომენტებით ამარაგებს, მაგრამ კამერამ არაერთხელ შეამჩნია მისი აფექტური მდგომარეობა, მათგან გამორჩეული კი "უოტრფორდთან" მატჩში ტროი დინის ავტოგოლის, "ლივერპულთან" მატჩში კი უეინ რუნის გოლებით გამოწვეული ემოციებია.



"იუნაიტედის" ოფიციალურ ტელევიზიასთან საუბრისას ერერამ ემოციურ აღნიშვნაზე ისაუბრა და ფილ ჯონსის, მაიკლ კერიკისა და მარკოს როხოს მსგავსად გულშემატკივართან ერთად ტრიბუნიდან მატჩის ყურების სურვილი გამოთქვა.

"ხანდახან, როცა საკუთარ თავს ვუყურებ, მრცხვენია, რადგან ემოციებს ვერ ვაკონტროლებ. როგორც მაგალითად, "უოტფორდთან" გამარჯვების ან "ლივერპულის" კარში მე-80 წუთზე გატანილი გოლის შემდეგ, რაც ჩვენთვის და ჩვენი გულშემატკივრებისთვის ძალიან მნიშვნელოვანია.

ყველგან გამარჯვებისთვის უნდა ჩავიდეთ და ფანებს საამაყო მივცეთ. ამიტომაც მაქვს ასეთი რეაქცია. ამ თამაშის მიმართ უდიდეს ვნებას განვიცდი და ყოველთვის ამას ვამბობ, როცა ასეთ დიდ გუნდში ვთამაშობ, იქ ყოფნა მაქსიმალურად დიდხანს გსურს. როცა გოლი გაგაქვს და გუნდი იმარჯვებს, ეს ნიშნავს, რომ ყველაფერი რიგზეა და საქმე კარგად მიდის, მე კი მინდა, ამის მონაწილე ვიყო. არაფერია ამ მომენტით გამოწვეულ გრძნობაზე უკეთესი".

რა თქმა უნდა, "ენფილდზე" გატანილი რუნის გოლი უდიდესი ემოცია იყო, როცა მარუან ფელაინის თავურის შემდეგ ბურთის ძელზე მოხვედრამ წამიერი იმედგაცრუება გამოიწვია.

"მართლაც ასეა. ფელაინის თავურს აღვნიშნავდი და ოდნავ იმედგაცრუებული დავრჩი, როცა ბურთი ხარიხას მოხვდა, მაგრამ უაზა იქვე იყო და ფანტასტიკური გოლი გაიტანა ჩვენი გულშემატკივრის წინაშე. ეს გოლი გავიდა იქ, სადაც ჩვენი გულშემატკივრები იმყოფებოდნენ, ასე რომ, არაფერია უკეთესი, ვიდრე ეს გრძნობა.

მეც მინდა გულშემატკივართან ერთად ტრიბუნაზე ყოფნა, მაგრამ ეს ნიშნავს, რომ ტრავმა უნდა მივიღო, მე კი იმედი მაქვს, რაც შეიძლება მეტ მატჩს ჩავატარებ. რა თქმა უნდა, ძალიან სასაცილო იყო ფილ ჯონსის ხილვა ტელევიზიით. ძალიან, ძალიან სასაცილო! გასახდელ ოთახში ამაზე დავცინოდით. მაგრამ ეს ნიშნავს, რომ ყველანი ჩართულები ვართ - ყველას გვინდა მაქსიმუმი გავიღოთ გუნდისთვის როცა ვთამაშობთ და მაშინაც, როცა არ ვთამაშობთ, ჩვენ კარგი ჯგუფი ვართ. გვინდა, ჩვენს გულშემატკივრებს საამაყო მივცეთ და ეს კლუბი კვლავ საუკეთესო გავხადოთ, ასე რომ, ძალიან ბედნიერი ვიყავი, როცა მაიკლი, ჯონაჰი და მარკოსი ჩვენს გულშემატკივართან ერთად გოლის აღნიშვნისას ვიხილე. ფანტასტიკა".

როცა ჰკითხეს, ასეთივე რეაქცია ჰქონდა თუ არა, როცა ანდრეს ინიესტამ 2010 წლის მსოფლიო ჩემპიონატის ფინალში გამარჯვების გოლი გაიტანა, ერერამ უპასუხა: "რა თქმა უნდა. მატჩს ჩემს მეგობრებთან ერთად ვუყურებდი. ამის ვიდეო არ არსებობს, მაგრამ რომ არსებობდეს, ძალიან, ძალიან გიჟური იქნებოდა!"

წყარო: manutd.com