ხვალ გასამართი სათასო შეხვედრის წინ, "მანჩესტერ იუნაიტედის" მთავარმა მწვრთნელმა, ლუი ვან გაალმა, პრესკონფერენცია გამართა და სხვა საკითხებთან ერთად, ტრავმირებულ მოთამაშეებზეც ისაუბრა.

პრემიერ ლიგის უკანასკნელ შეხვედრაში, "საუთჰემტონის" წინააღმდეგ, "იუნაიტედმა" კიდევ ერთი მცველი, მატეო დარმიანი დაკარგა, რომელიც შეინ ლონგთან შეჯახების შემდეგ შესაცვლელი გახდა. როგორც შემდგომ გაირკვა, იტალიელი საავადმყოფოში გადაიყვანეს, თუმცა რამდენიმე დღის შემდეგ თავად მატეომ აცნო გულშემატკივარს, ინსგაგრამის პოსტის საშუალებით, რომ ის კარგად არის და მოედანს მალე დაუბრუნდება, როგორც ჩანს, მწვანე მინდორზე მისი დაბრუნება ცოტა ხნით გადაიდო, რადგან როგორც ჰოლანდიელი სპეციალისტი აცადებს, დარმიანი გუნდს არ გაჰყვება დერბიში.

"მეტ-ნაკლებად ისევ ისეთი სიტუაციაა, როგორც წინა მატჩის წინ. დარმიანი მიუწვდომელია, თუმცა კერიკი ბრუნდება. რა თქმა უნდა, მას არ შეუძლია 90 წუთის თამაში, თუმცა ძალიან კარგია, რომ ის გუნდთან ერთად ვარჯიშობს. რაც შეეხება დარმიანს, მისი მდგომარეობა რთული არ არის და ეს კარგია, თუმცა ხვალ თამაშს იგი ვერ შეძლებს."

ისევ ტრავმირებულები არიან ბასტიან შვაინშტაიგერი და ფილ ჯონსი, რომელთაც 4-4 მატჩი გაუცდათ და კვლავ ვერ შეძლებენ გუნდის დახმარებას:

"ვერ გეტყვით, ისინი დაბრუნებასთან ახლოს არიან თუ არა, რადგან როდესაც რამე ტრავმირებულებზე ვლაპარაკობ, შესაძლოა, მეორე დღეს დაზიანება გაუარესდეს ან პირიქით, უნდა დაველოდოთ და ვნახოთ. ასევე შენ უნდა ივარჯიშო კარგად და შეიგრძნო პრემიერ ლიგის რიტმი, რომელიც ძალიან მაღალია. როდესაც დიდი ხნით ხარ ტრავმირებული, აღდგენითი პროცესი იწელება."

ლაზარეთში ასევე არიან: ლუკ შოუ, მარკოს როხო, ანტონიო ვალენსია და ეშლი იანგი, რომელთა დაბრუნება ახლო მომავალში არ იგეგმება, რადგან მათი ტრავმები სერიოზულია.