"მანჩესტერ იუნაიტედის" აღმასრულებელი დირექტორი ედ ვუდვორდი "საუთჰემპტონთან" განცდილი მარცხის შემდეგ რამდენიმე ფეხბურთელს ლუი ვან გაალის შესახებ ესაუბრა.

ვან გაალი ჰოლანდიაში გაფრინდა, რათა თავისი ქალიშვილის დაბადების დღე აღნიშნოს და ბრიტანეთში სამშაბათამდე არ დაბრუნდება, "იუნაიტედი" კი მანამდე ჩვეულ ვარჯიშებს არ ატარებს.

ორშაბათს გუნდს ვარჯიში საერთოდ არ გაუმართავს, რამდენიმე ინგლისური გაზეთი კი იტყობინება, რომ გუნდის მმართველობის სადავეებს ხელთ რაიან გიგზი იგდებს.

ვან გაალის შესახებ კი ვუდვორდი პირველი გუნდის ფეხბურთელებს ესაუბრა და მათთან ერთად გუნდის ბოლო დროინდელი თამაში განიხილა.




ჩარლი ოსტინის გოლის შემდეგ "იუნაიტედმა" სეზონში მეცხრე მარცხი განიცადა და ლიდერ "ლესტერ სიტის" უკვე 10 ქულით ჩამორჩება.

ჩემპიონთა ლიგაზე გუნდი აღარ ასპარეზობს, მის ზონამდე კი ხუთი ქულა აშორებს. გარდა ამისა, "იუნაიტედი" ლიგის თასსაც გამოეთიშა "მიდლსბროსთან" პენალტების სერიაში დამარცხების შემდეგ.

"საუთჰემპტონთან" მატჩში "იუნაიტედმა" მიმდინარე სეზონში ჩატარებულ 34 შეხვედრაში მე–18 წარუმატებლობა განიცადა. "ოლდ ტრაფორდზე" ჩატარებული ბოლო 11 მატჩიდან 10 შეხვედრის პირველ ტაიმში 0–0 დაფიქსირდა, გასული ზაფხულის შემდეგ კი პრემიერ ლიგაში მხოლოდ ორჯერ გაიტანა გოლი პირველ ტაიმში.




გულშემატკივარი უკმაყოფილოა გუნდის სათამაშო სტილითაც და უფრო მეტი შეტევისკენ მოუწოდებს, მაგრამ ვან გაალი უფრო ფრთხილ დაცვით ფეხბურთს ამჯობინებს.

სერ ალექს ფერგიუსონის წასვლის, ანუ 2013 წლის შემდეგ კლუბს ჯერ კიდევ არ მოუგია ტიტული, ვან გაალმა კი უკვე დახარჯა 250 მლნ. ფუნტი 18 თვეში.

წყარო: skysports