ანდერ ერერა აცხადებს, რომ უკვე მზად იყო "მანჩესტერ იუნაიტედის" გოლი აღენიშნა, როცა ტიბო კურტუამ მსოფლიო კლასის სეივი განახორციელა.

ესპანელმა ნახევარმცველმა ენტონი მარსიალის ჩაწოდებული ბელგიელი მეკარის კარში გადაგზავნა, თუმცა კურტუამ ურთულესი ბურთის მოგერიება მოახერხა.

საბოლოოდ, "იუნაიტედმა" გოლი ვერ გაიტანა და მატჩი 0-0 დასრულდა.

"ვფიქრობ, ფეხი სწორად დავარტყი. კარგ პოზიციაზე ვიყავი. ენტონის ჩაწოდება, ჩემი აზრით, ძალიან კარგი იყო, ამიტომ არ ვიცოდი, ასპილიკუეტა ბურთს შეეხებოდა თუ არა.

არ ვიცი, რა მოხდა, მართლა. აღნიშვნას ვაპირებდი და უცებ დავინახე, რომ ბურთი კარში არ შესულა. ამიტომ ახლა წუწუნს აზრი არ აქვს. დღეს ვაჩვენეთ, რომ უკეთესი გუნდი გვყავს, მაგრამ არასაკმარისად კარგი. ბედნიერები ვერ ვიქნებით, მაგრამ შეგვიძლია ვიამაყოთ იმით, რაც დღეს გავაკეთეთ. რეალისტები უნდა ვიყოთ, მატჩებს უნდა ვიგებდეთ, მაგრამ თამაშით სწორედ ასე უნდა ვთამაშობდეთ", - განაცხადა ბასკმა.

მიუხედავად იმისა, რომ ორივე გუნდმა ორი დღით ადრე ჩაატარა თავიანთი მატჩები, "ოლდ ტრაფორდზე" გამართულ შეხვედრაში ბოლომდე ბრძოლისთვის ძალები მაინც ჰყოფნიდათ.

"მიუხედავად სიტუაციისა, "ჩელსი" მაინც კარგი მოწინააღმდეგეა. ისინი ძალიან, ძალიან ძლიერები არიან და ფანტასტიკური ფეხბურთელები ჰყავთ. ვფიქრობ, ჩვენ უკეთესად ვითამაშეთ. დიდი ენერგია და ვნება გამოვავლინეთ, რათა გვეთამაშა ისე, როგორც უნდა ვთამაშობდეთ, მაგრამ ბევრი ლაპარაკი არ შემიძლია, მოედანზე უნდა ილაპარაკო და გულშემატკივარს სიამაყის საფუძველი მისცე.

პრემიერ ლიგა ყოველთვის გაძლევს მაღალი ადგილისთვის ბრძოლის საშუალებას და დღეს ეს ვაჩვენეთ. ბოლო 20 წუთში გონება უფრო სწრაფად მოქმედებს, ვიდრე ფეხები და ფიქრობ, რომ მეტი შრომა აღარ შეგიძლია, მაგრამ ახლა რამდენიმე დღე გვაქვს ფორმის აღსადგენად და საბრძოლველად", - დაასრულა ერერამ.

წყარო: manutd.com