მემფის დეპაი აცხადებს, რომ "მანჩესტერ იუნაიტედში" არსებული მდგომარეობა მის სამომავლო მიზნებზე გავლენას ვერ მაოხდენს.

ჰოლანდიის ნაკრების ფეხბურთელი ბევრს ვარჯიშობს და მოედანზე თავს კარგად გრძნობს, ამის ხარჯზე კი თანდათან ეჩვევა პრემიერ ლიგას.

ჰოლანდიური ერედივიზიდან ინგლისურ ლიგაში გადასვლის შემდეგ მემფისი ვერ ახერხებს ჩვეული თამაშის ჩვენებას, გარდა "ბრიუგესთან" მატჩში ნაჩვენები შედეგიანობისა, მაგრამ 21 წლის ფეხბურთელი თავდაჯერებულია და ამბიციების მიღწევის იმედი აქვს.

თავის ოფიციალურ ფეისბუქ-გვერდზე მიცემულ ინტერვიუში მემფისმა ისაუბრა და განაცხადა, რომ მანჩესტერში ფეხს იკიდებს.

"მსოფლიოს საუკეთესო ფეხბურთელობა - ეს ჩემი მთავარი მიზანია და ამას ვერ უარვყოფ. დამიჯერეთ, ზეწოლა ვერასდროს შემაჩერებს.

სამწუხაროა. ვიცი, რომ უკეთაც შემიძლია. ჯერ თავი უნდა დავიმკვიდრო და პრემიერ ლიგის ფეხბურთს შევეგუო, ჩემს ინგლისურ ცხოვრებას შევეჩვიო. რა თქმა უნდა, გსურს, ყველაფერი კარგად მიდიოდეს, მაგრამ ხანდახან ასეთი რამ არ ხდება. თუმცა ხელის ჩაქნევა გამოსავალი არ არის".

დეპაი, რომლის შეძენა დადასტურებული ინფრომაციით "ლივერპულსა" და პსჟ-საც სურდათ, როცა იგი პსვ-ში თამაშობდა, აცხადებს, რომ ჰოლანდიურ კლუბსა და "იუნაიტედში" თამაშს შორის დიდი განსხვავებაა.

"ვიცი, როდის ვთამაშობ ცუდად და როდის კარგად. რაც ნამდვილად მნიშვნელოვანია, ეს არის პოზიტიური განწყობა. ბევრი შრომა. ყოველდღე ვცდილობ უკეთესი ფეხბურთელი გავხდე. ამის კეთებისას შენს სატრანსფერო ფასსა თუ ლეგენდარული ნომრის ტარებაზე არ ფიქრობ.

აქ უზარმაზარი განსხვავებაა. მცველები ფიზიკურად ძლიერები არიან, ძალიან კარგ ფორმაში მყოფები და არაფერი აშინებთ. ჩემთვის ეს განსხვავებული იყო, განსაკუთრებით პირველ მატჩებში. ამას უნდა შევეგუო. პსვ-ში არ იყო აუცილებელი ყოველ მატჩში ჩემი საუკეთესო თამაში მეჩვენებინა. როცა პრემიერ ლიგაში თამაშობ, ვალდებული ხარ. საკუთარი თავისგან მაქსიმუმი უნდა მიიღო. კარგი საკმარისი არ არის, როცა "იუნაიტედის" ფეხბურთელი ხარ".

21 წლის ფეხბურთელი თავის ფიზიკურ მდგომარეობასაც შეეხო.

"ჩემი სხეულის წონა ისეთივე დაბალია, როგორც მანამდე. კუნთების დამსახურებაა, მაგრამ არა იმიტომ, რომ სავარჯიშო დარბაზში თავს ვიკლავ, ამას არასდროს ვაკეთებ. პირველი რამდენიმე კვირის განმავლობაში უფრო ნელი ვიყავი, მაგრამ ახლა ჩემს აჩქარებას ვარჯიშებზე დიდ ყურადღებას ვუთმობ, ვგრძნობ, რომ ვვითარდები. უკეთესი და უკეთესი ვხდები.

უფრო ზუსტად, ჩამოვშორდი იმას, რასაც სამი ან ოთხი თვის წინ ვაკეთებდი. ახლა მხოლოდ ის დარჩა, რომ ეს ყველაფერი მოედანზე ვაჩვენო. გოლების გატანითა და პარტნიორებისთვის საგოლე პასების გაკეთებით. უფრო ნაკლები უნდა ვიფიქრო მოძრაობებზე, რომელსაც ვაკეთებ. ასე უფრო ბუნებრივი იქნება. "უოტფორდის" წინააღმდეგ გატანილი გოლი და "ბრიუგესთან" მატჩი, უბრალოდ ვიცი: წინ უფრო მეტი მელის. ჩაინიშნეთ ჩემი სიტყვები. არ იდარდოთ".

წყარო: manutd.com