მაიკლ კერიკი "ბორნმუთთან" მისი გუნდის დამარცხების გამართლებას არ ცდილობს. გამოცდილი ნახევარმცველი თვლის, რომ "წითელმა ეშმაკებმა" რთულ ვითარებაში ერთად დგომა უნდა მოახერხონ.

"ვიტალიტი სტედიუმზე" გამართულ შეხვედრაში ჯუნიორ სტანისლასმა გახსნა ანგარიში, რასაც მარუან ფელაინიმ ანგარიშის გამათანაბრებელი გოლით უპასუხა, თუმცა "იუნაიტედმა" ანგარიშის შენარჩუნება ვერ მოახერხა და ჯოშუა კინგის გოლის შემდეგ ბორნმუთი უქულოდ დატოვა.

ბოლო კვირაში ჩატარებულ სამ მატჩში ლუი ვან გაალის გუნდი ორჯერ დამარცხდა და არც ერთხელ მოუპოვებია გამარჯვება, ჩემპიონთა ლიგაზე წაგება კი კლუბს ტურნირის დატოვებად დაუჯდა.

"ძალიან იმედგაცრუებულები ვართ და ეს კვირის ყველაზე ცუდი დასასრულია. დღეს წინა მარცხზე რეაქციის ჩვენება გვინდოდა. მაგრამ ვერც ახლა გავართვით თავი სტანდარტულებს. ორივე გუნდს ჰქონდა მომენტი, მაგრამ მნიშვნელოვანი მხოლოდ მატჩის საბოლოო ანგარიშია და სასურველ შედეგს ვერ მივაღწიეთ, ასე რომ, ასეთია ძალიან სამწუხარო კვირის დასასრული", - განაცხადა კერიკმა.

"იუნაიტედის" დახმარებას მატჩში რვა ტრავმირებული ფეხბურთელი ვერ ახერხებდა, მატჩის მიმდინარეობისას კი ჯესი ლინგარდიც დაშავდა. ბასტიან შვაინშტაიგერი დისკვალიფიკაციის გამო ვერ თამაშობდა, თუმცა კერიკი არ აპირებს ყველაფრის ტრავმებისთვის დაბრალებას.

"შემიძლია, გასამართლებელი მიზეზი მოვძებნო, მაგრამ ტრავმები ყოველთვის არსებობს და მათთან გამკლავება უნდა შეგვეძლოს. ამისთვის დიდი შემადგენლობა გვყავს და იმიტომაც ვართ კლუბი, რომ სეზონის მიმდინარეობისას ტრავმები აუცილებლად გექნება, ეს ფეხბურთის ნაწილია. ადვილი არ არის, მაგრამ ასეთ სიტუაციებში უნდა გამოხვიდე, თამაში აჩვენო და გაიმარჯვო. რაც შეიძლება მალე უნდა მოვახერხოთ ეს".

ახლა მთელი ყურადღება "ნორვიჩ სიტისთან" მატჩზეა გადატანილი და კერიკი აღიარებს, რომ ეს მატჩი მნიშვნელოვანი იქნება. "ერთადერთი, რაც ახლა შეიძლება გავაკეთოთ - ერთად დგომა, სავარჯიშო მოედანზე დაბრუნება, თავდადებით შრომა და მომდევნო კვირას კლასის ჩვენება გახლავთ. ეს ერთადერთი საშუალებაა მოედანზე გასვლისას გამოსასწორებლად. შეგვიძლია, ეს ყველაფერი დიდხანს განვიხილოთ, მაგრამ შედეგი უფრო მნიშვნელოვანია და მისი მოპოვება მომდევნო კვირიდანვე უნდა დავიწყოთ".

წყარო: manutd.com