სქემა და შემადგენლობა

ფილ ჯონსის არასაკმარისი ფიზიკური მზადყოფნის მიზეზით ლუი ვან გაალმა ცენტრალური მცველის პოზიციაზე დეილი ბლინდი დააბრუნა. მატეო დარმიანმა მარჯვენა მცველის პოზიცია დაიკავა ანტონიო ვალენსიას ტრავმის გამო. სხვა პოზიციებზე იგივე ფეხბურთელები გამოვიდნენ, რომლებიც ბოლო ორ კვირაში თამაშობდნენ.



ფაბულა

"მანჩესტერ იუნაიტედმა" სეზონის ერთ-ერთი ყველაზე არადამაჯერებელი მატჩი ჩაატარა. გუნდს აგრესია და სისწრაფე აკლდა. 10-დან 15-ე წუთამდე "კრისტალ პალასმა" ძლიერი მონაკვეთი ჩაატარა. მასპინძლებს გოლის გატანა მხოლოდ დავიდ დე ხეას შესანიშნავი თამაშისა და ცუდი რეალიზაციის გამო არ გამოუვიდათ. მე-15 წუთიდან 45-ე წუთამდე "მანჩესტერ იუნაიტედმა" ჩაიგდო ინიციატივა და ორი სახიფათო მომენტი შექმნა, მაგრამ ვერც რუნიმ და ვერც ერერამ ვერ გამოიყენეს.

მეორე ნახევარი ალან პარდიუს გუნდის უპირატესობით წარიმართა. "იუნაიტედს" ბურთის კონტროლი არ გამოსდიოდა. ვან გაალის ცვლილებებმა მატჩში გარდატეხა ვერ შეიტანეს.

საბოლოო ანგარიში 0:0 ასეთ თამაშში კარგ ანგარიშად უნდა ჩაითვალოს, რადგან "კრისტალ პალასი" უფრო ახლოს იყო გამარჯვებასთან.

საყრდენი ზონა

როგორც ჩანს, ლუი ვან გაალმა შვაინშტაიგერი - შნეიდერლინის წყვილი ძირითად ვარიანტად აირჩია, მაგრამ არსებობს კითხვები.

ფრანგი იმ ფეხბურთელთა სიაში შედის, რომლის მიმართ ცოტა პრეტენზია არსებობს. მოწინააღმდეგეთა შეტევებს კარგად ახშობს, კარგად მოქმედებს უბურთოდ, შემტევ ხაზს აზღვევს, ყველაზე მეტ ჩაჭრასა და წართმევას ახორციელებს.

"კრისტალ პალასის" წინააღმდეგ შნეიდერლინმა მისთვის ჩვეულ მანერაში ითამაშა.



როცა ერთი საყრდენი ნახევარმცველი ჩაშლაზეა ორიენტირებული და თავის ფუნქციებს თავს ართმევს, მეორისგან უფრო მეტ შექმნას მოელიან. ხოლო თუ მეორე ნახევარმცველი მსოფლიოს ჩემპიონი ბასტიან შვაინშტაიგერია, მოთხოვნის დონე უფრო მაღლა იწევს. გერმანელს ჰქონდა წარმატებული მატჩები, იყო შეხვედრებიც, სადაც მაიკლ კერიკზე უპირატესობა დაადასტურა, თუმცა ბასტიანი უფრო ხშირად ტიპიური მაიკლივით მოქმედებს: საერთო სურათს აფუჭებს, ზუსტი პასების მაღალი პროცენტული მაჩვენებელი აქვს, გუნდს საიმედოობას მატებს მოედნის ნახევარში, მაგრამ ნაკლები სარგებელი აქვს შეტევაში და ხშირად აყოვნებს თამაშს.

შნეიდერლინი, ერერა, შვაინშტაიგერი, კერიკი, ბლინდი - ჯერჯერობით ოპტიმალური შერჩევა ნაპოვნი არ არის, პროექტულ სიძლიერეზე კი არც ერთი დუეტი არ გასულა. საინტერესო იქნება ერერას ნახვა ნომერი 8-ს პოზიციაზე. გასულ სეზონში ბლინდი - ერერას წყვილი ყველაზე სწრაფ ტემპს აჩვენებდა, მაგრამ დაცვით ფუნქციებს ცუდად ართმევდა თავს. ამ პირობებში ერერა - შნეიდერლინი საკმაოდ საინტერესო სვლა ჩანს.

ვნახოთ, რას გადაწყვეტს ლუი ვან გაალი.

თავდაცვა

მარკოს როხოს "მანჩესტერ სიტისთან" მატჩში ერთ-ერთ საუკეთესო ფეხბურთელად ასახელებდნენ - კევინ დე ბრუინესა და ხესუს ნავასის მატჩიდან გამოთიშვა მოახერხა. ამასთან ერთად, ცსკა-სთან მატჩში როხო ყველაზე ცუდი იყო. სლუცკის გუნდი რთულს არაფერს აკეთებდა - უბრალო პასი ცენტრალური მცველების ზონაში და როხო ყოველთვის იმას ახერხებდა, რომ ფერნანდესი მას ასწრებდა, რადგან არასწორ პოზიციას ირჩევდა.

"კრისტალ პალასის" ყველაზე მრისხანე იარაღი ფლანგებია. იანიკ ბოლასიესა და მარკოსის დუელი ცალკეულ ვიდეოს იმსახურებს და მეეჭვება "იუნაიტედის" გულშემატკივარს მოეწონოს.

მეორე მხარეს უილფრიდ ზაჰა დარმიანს აწიოკებდა და ყვითელი ბარათი "აკიდა". სამართლიანობის გულისთვის, მსაჯს შეეძლო ადრეც მიეცა ბარათი იტალიელისთვის. ვან გაალმა აგვისტოს საუკეთესო ფეხბურთელი შეცვალა, რადგან დიდი ალბათობით გუნდი მატჩს 10 კაცით დაასრულებდა.

დეილი ბლინდიც არ ბრწყინავდა. ჰოლანდიელს შეტევის ორგანიზებაში განსაკუთრებული როლი ერგება, მაგრამ ამ კომპონენტშიც არ მოუხდენია შთაბეჭდილება, წაგებული 6 საჰაერო ორთაბრძოლა კი საერთოდ ხასიათს გიფუჭებს.



კრის სმოლინგი უფრო საიმედო იყო, თუმცა რთულია მცველის თამაშის ცალსახად შეფასება ისეთ პირობებში, როცა მისმა სამმა პარტნიორმა მეტოქეს ბევრჯერ მისცა მომენტის შექმნის უფლება და ხშირად ცდებოდნენ.

ცალკე უნდა აღინიშნოს "იუნაიტედის" უყურადღებო თამაში სტანდარტული მდგომარეობისას. ფელაინი და სხვები საჰაერო ორთაბრძოლებს აგებდნენ, "იუნაიტედს" მხოლოდ "კრისტალ პალასის" ფეხბურთელების უზუსტობა შველოდა.

თავდასხმა

ოთხი ფრე ზედიზედ, სამი მატჩი უგოლოდ - "მანჩესტერ იუნაიტედის" სამწუხარო სტატისტიკა.

ბოლოს ასეთი რამ 2005/06 წლების სეზონში მოხდა, ანუ 10 წლის წინ.



ბევრს დაავიწყდა (ან არც იცოდა), მაგრამ იმ სეზონში "ოლდ ტრაფორდი" სერ ალექს ფერგიუსონს უსტვენდა, პენსიაში გზავნიდნენ და არასანახაობრივი ფეხბურთის გამო აკრიტიკებდნენ. სხვათაშორის, გულშემატკივართა განსჯითი უნარები ამ ანალიზის განხილვის თემა არ არის.

"კრისტალ პალასის" წინააღმდეგ ცუდ შეფასებას იმსახურებს ყველა ფეხბურთელი, რომელიც შეტევასა და შექმნაზე აგებს პასუხს, გარდა ენტონი მარსიალისა.

მატა და ერერა კრეატივისა და ტიკი-ტაკას ნაცვლად, რაც მათ შეჰფერით, ერთმანეთს უშლიდნენ ხელს და არაფერს აკეთებდნენ. ერერამ გუნდის ყველაზე სახიფათო ეპიზოდი ვერ გამოიყენა, რადგან ბურთს უბრალო სიტუაციაში ვერ დაარტყა.

რუნიმ ამ სეზონისთვის ტიპიური მატჩი ჩაატარა.

შეცვლაზე შესულმა ლინგარდმა აჩვენა სწორედ ის, რაც წინა მატჩებში: სწრაფად სირბილი შეუძლია.

მარსიალი ხალხის გახარებას აგრძელებს. არსებობს მოსაზრება, რომ მარცხენა ფლანგზე მთელ თავის პოტენციალს ვერ ავლენს, თუმცა საფრანგეთის ჩემპიონატში ყველაზე უკეთ სწორედ მარცხნიდან თამაშობდა.

"კრისტალ პალასს" ენტონის შეჩერება მხოლოდ ჯარიმის ხარჯზე გამოსდიოდა - კელიმ ჯერ კიდევ პირველ ტაიმში მიიღო ყვითელი ბარათი და მწვრთნელმა მეორე ფლანგზე გადაიყვანა. მარსიალმა ასევე რუნი გაიყვანა ერთი-ერთზე შესანიშნავი პასით, შეუქმნა კარგი მომენტი ერერას და ბოლოს თავადაც შეეძლო თავის გამოჩენა, როცა მისი დარტყმული მცველმა დაბლოკა.

თუ ბოლო მატჩებში პოზიტივის ძებნას დავიწყებთ, ალბათ, მხოლოდ ის გაგვახარებს, რომ "მანჩესტერ იუნაიტედის" შემადგენლობაში გამოჩნდა ადამიანი, რომელსაც მარტოს შეუძლია თავდასხმის ცენტრსა და ფლანგზე საქმის კეთება.

ბოლოს

ბოლო ორ კვირას გუნდი სუსტად ატარებს. "მანჩესტერ იუნაიტედს" რთული პერიოდი აქვს, თვალში მოსახვედრია შეტევის ორგანიზება ან/და მისი დასრულება.

ლუი ვან გაალი ხშირად ეძებს გამოსავალს რთული მდგომარეობიდან ტაქტიკური ცვლილებების ხარჯზე, აქიდან გამომდინარე მოსალოდნელია ახალი სქემის დანერგვა ან ძველ, ნაცადთან დაბრუნება. რთულია პროგნოზირება, იქნება ეს ორი საყრდენით თამაშზე უარის თქმა თუ სხვა რამ. გამორიცხული არ არის, რომ 10-ანის პოზიციაზე მარუან ფელაინის მიეცეს შანსი. 2013/14 წლების სეზონში ამ სვლამ "იუნაიტედს" არაერთი ქულა მოუპოვა. ამ სეზონში ბელგიელი, რომელიც შვაინშტაიგერს უცვლის პოზიციას, ჯერჯერობით ვერ აჩვენებს საუკეთესო ფეხბურთს.

მომდევნო თამაში ჩემპიონთა ლიგაზე სამ ნოემბერს ცსკა-სთან გაიმართება.

ავტორი: ალექსანდრ გრაიროვიჩი