შესაძლოა, ლუი ვან გაალი დღეს ლიგის თასზე რამდენიმე ფეხბურთელის დასვენებას აპირებს, მაგრამ ფილ ჯონსი და მორგან შნეიდერლინი აღნიშნავენ, რომ ტურნირი "წითლებისთვის" მნიშვნელოვანია და ჩემპიონშიპის წევრი გუნდის წინააღმდეგ მატჩს სერიოზულად ეკიდებიან.

"იპსვიჩის" დამარცხების შემდეგ "წითელი ეშმაკები" მეოთხე რაუნდში "ოლდ ტრაფორდზე" "მიდლსბროს" დაუპირისპირდებიან.

ორივე, ჯონსიცა და შნეიდერლინიც რთულ მატჩს ელოდებიან და ფრანგს იმედი აქვს, რომ სადებიუტო სეზონში ტიტულს მოიგებს.

"თასი ყველა ფეხბურთელს აძლევს თავის გამოჩენის საშუალებას. როგორც ვიცი, მწვრთნელს რამდენიმე ფეხბურთელის შეცვლა სურს და ეს ძალიან მნიშვნელოვანია, რადგან ჩვენ ჯგუფი ვართ და ყველა იღებს მონაწილეობას მოედანზე ყველაფრის გაღებით. ამ თასის მოგება გვინდა.

"მანჩესტერ იუნაიტედმა" ყველაფრის მოგება უნდა სცადოს და სწორედ ამის გაკეთებას ვისახავთ მიზნად. დაინახვდით, რომ, როცა "იპსვიჩს" ვეთამაშებოდით, თასს სერიოზულად მივუდექით და ასევე იქნება "მიდლსბროსთან", რომელიც კარგი გუნდია. გასულ სეზონში პრემიერ ლიგაში დაბრუნებასთან ახლოს იყვნენ, ასე რომ, რთული მატჩი იქნება და რაც შეიძლება სერიოზულად მოვემზადეთ", - განაცხადა ფრანგმა.

"მიდლსბრო" ამჟამად ჩემპიონშიპში მეოთხე ადგილზე იმყოფება და პრემიერ ლიგაში დაბრუნებისთვის იბრძვის, ამის გაკეთებაში მადრიდის "რეალის" ყოფილი მცველი აიტორ კარანკა ეხმარება. ჯონსმა აღნიშნა, რომ სტუმრები გამოწვევისთვის მზად იქნებიან და ტურნირზე რაც შეიძლება შორს გასვლას ისურვებენ.

"მიდლსბრო" ჩემპიონშიპის კარგი გუნდია, ამ სეზონში კარგად თამაშობენ და განსხვავებული მატჩი იქნება.

"ოლდ ტრაფორდზე" ჩამოდიან და ეს მათთვის დიდი მატჩი იქნება. ზოგ ფეხბურთელს, ალბათ, არასდროს უთამაშია "ოლდ ტრაფორდზე", ასე რომ, შესაძლებლობა ექნებათ.

უნდა დავრწმუნდეთ, რომ ყურადღებით ვიქნებით და ჩვენს საქმეს გავაკეთებთ. რადგან ისინი ჩემპიონშიპში თამაშობენ, არ ნიშნავს, რომ თამაშს მოვიგებთ; კარგად ვითამაშებთ და იმედი მაქვს, მოვიგებთ, რადგან ეს არის ტურნირი, რომელზეც კარგად გამოსვლა გვსურს", - განაცხადა ჯონსმა.

წყარო: manutd.com