ანდერ ერერას სჯერა, რომ "მანჩესტერ იუნაიტედს" ნებისმიერი მეტოქის დამარცხება შეუძლია, თუკი მისი თანაგუნდელები ისეთ თამაშს აჩვენებენ, როგორსაც "ევერტონის" წინააღმდეგ.

ესპანელმა ნახევარმცველმა მეორე გოლი გაიტანა "ევერტონთან" მატჩში, სადაც "იუნაიტედმა" 4 წლის შემდეგ პირველი გამარჯვება მოიპოვა, ერერა კი ფიქრობს, რომ "არსენალთან" დამარცხება ასეთი გამარჯვების საწინდარი იყო.

"კანფეტებთან" ნაჩვენები თამაშით ერერა მატჩის საუკეთესო ფეხბურთელად დასახელდა და შეხვედრის შემდეგ "იუნაიტედის" ოფიციალურ ტელეარხს განუცხადა: "თუ ასე თამაშს გავაგრძელებთ, ყველას დავამარცხებთ. ყველას ვაჩვენეთ, რომ "მანჩესტერ იუნაიტედი" აქ არის და იმისთვის არის, რომ ყველაფრისთვის იბრძოლოს.

როცა "არსენალთან" დავმარცხდით, ამ თამაშამდე ვეღარ ვითმენდით. ვფიქრობ, დღეს პირველი 20 წუთი ფანტასტიკური იყო და სწორედ ასეთი რეაქცია უნდა გამოგვევლინა. როცა ყველაფრისთვის იბრძვი, ისე უნდა იბრძოლო, როგორც ჩვენ ვიბრძოლეთ დღეს", - განაცხადა ერერამ.

ანდერმა მარკოს როხოც შეაქო შეხვედრაზე გავლენის მოხდენისთვის და არგენტინელის გამო მოხარული იყო.

"ფანტასტიკურად ჩამიწოდა, მადლობა გადავუხადე! მახსოვს, ბილბაოს "ატლეტიკის" რიგებში ჩატარებულ ერთ-ერთ ბოლო შეხვედრაში ჩემი ბოლო გოლი თავით გავუტანე "სევილიას". თავით გატანა ერთ-ერთი ჩემი საყვარელი საქმეა და ინგლისში, მით უმეტეს".

კაპიტანმა უეინ რუნიმ შეხვედრის საბოლოო ანგარიში დააფიქსირა და თავის ყოფილ გუნდს გაუტანა, ერერას კი სჯერა, რომ ინგლისელის მონდომება გადამწყვეტი იყო გამარჯვებისთვის.

"ჩვენთვის დიდებული საქმე გააკეთა. ინგლისისა და ჩვენთვის რუნი ძალიან მნიშვნელოვანია. როცა კაპიტანი კარგ ფორმაში გყავს, გოლები გააქვს და ბედნიერია, ძალიან მნიშვნელოვანია. ჩვენი ლიდერია, ინგლისის ისტორიაში საუკეთესო ფეხბურთელი, ასე რომ, მას უნდა ვასიამოვნოთ და ეს წაგვადგება".

ახლა ყურადღება ჩემპიონთა ლიგის ოთხშაბათის მატჩზე გადადის, სადაც "იუნაიტედი" მოსკოვის CSKA-ს დაუპირისპირდება და ერერას სჯერა, რომ მნიშვნელოვანია ფეხბურთელების კონცენტრირება მატჩზე.

"ძალიან ამაყები და ბედნიერები ვართ ამ გამარჯვებით, მაგრამ ზეიმისთვის დიდი დრო არ გვაქვს. ამ კვირაში რუსეთში უნდა ჩავიდეთ და ჯგუფი ჯერ კიდევ თანაბარია".

წყარო: manutd.com