სალამი ყველას.

დღეს კიევიდან, უკრაინის დედაქალაქიდან გწერთ, სადაც ევროპის 2016 წლის საკვალიფიკაციო ეტაპს ვამთავრებთ. როგორც იცით, სირთულეები გამოვიარეთ, მაგრამ ბოლო რამდენიმე გამარჯვებამ საფრანგეთის საგზური მოგვიპოვა, სადაც საშუალება გვექნება ტურნირის ორჯერ მოგებული ტიტული დავიცვათ.

კიევი ჩემთვის კარგ მოგონებებთან ასოცირიდება: 2012 წლის ევროპის ჩემპიონატის ფინალი. მრავალი სასიამოვნო მომენტი მახსენდება და არა მარტო იმასთან დაკავშირებით, რაზეც ფიქრობთ. გამიმართლა, რომ იმ მატჩში რამდენიმე წუთი ვითამაშე და როცა თითქმის პირველად შევეხე ბურთს, ტურნირის უკანასკნელი გოლი გავიტანე. ახლა იმავე სასტუმროში ვართ და სტადიონისკენ მიმავალმა გზამ 2012 წლის ივნისი-ივლისის დღეები გამახსენა. გასახდელი ოთახი იგივე არ არის, იმიტომ, რომ მაშინ იტალიის წინააღმდეგ მასპინძელი გუნდის რანგში ვთამაშობდით, ახლა კი უკრაინასთან სტუმრები ვართ. ვფიქრობ, ჩვენმა გუნდმა 2012 წლის იმ კვირებში შესანიშნავად ითამაშა და იმედი მაქვს, მომდევნო წელს საფრანგეთშიც იგივეს გავაკეთებთ. კარგი ფეხბურთელები გვყავს გუნდში და იმდენად კონკურენტული გენები, რომ საუკეთესო გუნდებს შევეჭიდოთ.

ვულოცავ ყველა გუნდს, რომლებიც უკვე გავიდნენ ევროპის ჩემპიონატზე, განსაკუთრებით იმათ, ვინც პირველად ითამაშებს ამ ტურნირზე, მაგალითად, ისლანდია და ალბანეთი. დარწმუნებული ვარ, დიდებული ტურნირი იქნება. ბრიტანულ ფეხბურთს ინგლისი, უელსი და ჩრდ. ირლანდია წარმოადგენენ. ამასთან ერთად, ირლანდიის რესპუბლიკის ნაკრები პლეი-ოფის რაუნდში იბრძოლებს.

როგორც კი მანჩესტერში დავბრუნდებით, ახალი მატჩებისთვის უნდა მოვემზადოთ, რომლებიც რთული იქნება. პირველი "ევერტონის" წინააღმდეგ, ყოველთვის დაძაბული და სრულყოფილი მატჩი, შემდეგ კვირაში კი მოსკოვის CSKA-სა და "მანჩესტერ სიტის" წინააღმდეგ. ოქტომბერი ძალიან რთული თვე იქნება და ამისთვის მზად უნდა ვიყოთ.

წყარო: manutd.com