ენტონი მარსიალი აცხადებს, რომ მას შეუძლია დაეხმაროს გუნდს პრემიერ ლიგისა და ჩემპიონთა ლიგის მოპოვებაში. ახალგაზრდა ფორვარდმა უკვე შეძლო 4 გოლის გატანა, მას შემდეგ, რაც "მონაკოდან" 36 მილიონის სანაცვლოდ გადაბარგდა ''ოლდ ტრაფორდზე''.

"ვფიქრობ, ჩვენ შეგვიძლია პრემიერ ლიგისა და ჩემპიონთა ლიგის მოგება ამავე სეზონში." აცხადებს ენტონი ფრანგულ მედიასთან ინტერვიუში. "ჩვენ ევროპის ტოპ 5 კლუბს შორის ვართ. ჯერ ყველაფერი კარგად მიდის."

"ფანებმა გულთბილად მიმიღეს და მე საერთოდ არ ვფიქრობ ჩემს სატრანფერო ღირებულებაზე, როდესაც მოედანზე ვიმყოფები. ისეთი კონკურენტი კლუბის კარში გოლის გატანამ, როგორიც "ლივერპულია", ფანებს საშუალება მისცა, უკეთ გაეცნოთ ჩემი თავი."

ფრანგი თინეიჯერის ასპარეზობით მხოლოდ "იუნაიტედის" ფანები არ მოხიბლულან, იგი საფრანგეთის ნაკრებშიც კარგ შთაბეჭდილებას ტოვებს.

"მას დიდი პოტენციალი გააჩნია" - აცხადებს საფრანგეთის ნაკრების მწვრთვნელი, დიდიე დეშამი. "ყველა მოხიბლულია იმით, თუ როგორ ირჯება ის კლუბში და ეს ნაკრებისთვისაც მომგებიანია. იგი ნამდვილად იმსახურებს აქ ყოფნას. მან უკვე გააჩუმა ხალხის გარკვეული ნაწილი. ენტონი ჯერ ახალგაზრდაა და შესაძლოა რთული პერიოდები ჰქონდეს, მაგრამ მას შეუძლია გამორჩეული მომენტების შექმნა, რასაც "მონაკოში" აკეთებდა." - დაასრულა საფრანგეთის ნაკრების თავკაცმა.

წყარო: Mirror