ლუი ვან გაალი ფიქრობს, რომ "ვოლფსბურგთან" მატჩში გამარჯვების გოლის ავტორი, კრის სმოლინგი თავისი ფორმისა და განვითარებისთვის ქებას იმსახურებს.

სმოლინგი მიმდინარე სეზონში ბრწყინავს და "წითელი ეშმაკების" რიგებში უდავოდ საუკეთესო მოთამაშეა დეილი ბლინდთან ერთად დაცვაში ნაჩვენები შედეგიანობის გამო.

სინამდვილეში, კრისმა თავისი დადებითი მხარეები მაშინ წარმოაჩინა, როცა ლუი ვან გაალმა 2014 წლის ზაფხულს გუნდი ჩაიბარა და როცა ჰოლანდიელს ჰკითხეს, თუ რას აკეთებდა იგი კრისის განსავითარებლად, მან თავისი დამსახურება უმალ დაამდაბლა.

"ვფიქრობ, როცა მოთამაშე რამეს აკეთებს, თვითონ აკეთებს", - განუცხადა ვან გაალმა ჟურნალისტებს პარასკევს, "არსენალთან" დაპირისპირებამდე.

"მას რჩევებით, მოთხოვნილებებით, სავარჯიშო სესიებითა და სურათებით ვეხმარები, რათა განვითარდეს, მაგრამ გახსნილი უნდა იყოს და ეს ყველაფერი მოედანზე შეასრულოს. ყველაფერს თვითონ აკეთებს. უდიდესი კომპლიმენტი, რომელიც ვინმეს უნდა გაუკეთოთ, კრისია და არა მე".

სმოლინგი სერ ალექს ფერგიუსონმა 2010 წელს შეიძინა, როცა დაცვის ცენტრში არჩევანი რიო ფერდინანდსა და ნემანია ვიდიჩზე შეჩერდა, რამაც ინგლისელს საშუალება მისცა გამოცდილი ფეხბურთელებისგან ესწავლა.

ახლა სმოლინგი სასტარტო შემადგენლობის რეგულარული წევრია და ნასწავლს პრაქტიკაში იყენებს. "რა თქმა უნდა, შანსი ამის გამოც მიიღო, მაგრამ ეს ყოველთვის ასეა. როგორც მოთამაშეს, შენს პოზიციაზე ვაკანსიები გჭირდება და როცა მას იღებ, უფრო მეტი იღბალი გაქვს. საფეხბურთო კლუბებში ეს ყოველთვის სიმართლეა".

კარგ ხასიათზე მყოფმა ვან გაალმა ეშლი იანგიც შეაქო, როცა სავარჯიშო ბაზაზე ვარჯიშის შემდეგ ნომინალურ ვინგერსა და ხანდახან მცველის პოზიციაზე მოთამაშე ფეხბურთელის შესახებ ჰკითხეს: "ეშლი იანგი ძალიან მნიშვნელოვანია, გუნდური ფეხბურთელია.

პირველ რიგში, ის გუნდური ფეხბურთელია. ყველა მოთამაშე არ არის გუნდური, მაგრამ ეშლი ყოველთვის გუნდზე ფიქრობს. მრავალ პოზიციაზე შეუძლია თამაში და მწვრთნელისა და მენეჯერისთვის ფანტასტიკურია, რომ ამას აკეთებს.

ოთხაშაბათს მარჯვენა მცველად მოგვევლინა, სადაც ბევრი მატჩი არ ექნება ჩატარებული. მეორე გოლი მისგან დაიწყო. ძალიან მნიშვნელოვანი იყო მეორე ტაიმში რომ იქ ითამაშა და მის გამო ბედნიერი ვარ. მის როლს ერგება და ესეც მნიშვნელოვანია".

წყარო: manutd.com