„იუნაიტედის“ თავკაცმა, ლუი ვან გაალმა ბასტიან შვაინშტაიგერთან ერთად მატჩისწინა პრეს კონფერენცია გამართა, სადაც ტრავმირებულ ფეხბურთელებზე, ფინალში გასვლის შესაძლო შანსებზე და საშინაო მატჩების მნიშვნელობაზე ისაუბრა.

„ვფიქრობ, ჩემპიონთა ლიგაზე აუცილებელია ყველა საშინაო მატჩის მოგება. სხვა შემთხვევაში, საქმე ძალიან გართულდება. მნიშვნელოვანია, რომ დღეს სამი ქულა მოვიპოვოთ.“

„ბარსელონას“ და „ბაიერნის“ ყოფილი მწვრთნელი დარწმუნებულია, რომ მას შეუძლია გუნდი ფინალში გაიყვანოს.

„ეს რეალური იმედი და მიზანია, რადგან ფინალში ყველა ჩემი გუნდი გავიყვანე. ფინალში გასვლა ყოველთვის მიზანია, იქ კი უკვე ბევრი რამ იღბალზეა დამოკიდებული. ამ ეტაპამდე მიღწევა უკვე ძალიან დიდი წარმატებაა. მედია ამას არ ითვალისწინებს, რადგან მხოლოდ გამარჯვებულია საუკეთესო, მეორე გუნდს კი ყველანაირი დამსახურება ეკარგება. „მანჩესტერ იუნაიტედმა“ კარგად იცის, თუ რამხელა მნიშვნელობა აქვს გამართლებას ფინალში. „ბაიერნის“ ფეხბურთელები 1999 წელს უკვე საზეიმოდ ემზადებოდნენ, როცა ორ წუთში ტიტული ხელიდან გამოაცალეს.“

ლუი ვან გაალს ბასტიან შვაინშტაიგერიც ეთანხმება. გერმანელი ნახევარმცველი ფიქრობს, რომ კლუბს ამ მიზნის მისაღწევად საჭირო რესურსი აქვს.

„დიახ, ვფიქრობ შეგვიძლია. თუმცა მანამდე, ბევრი მუშაობა მოგვიწევს და როგორც მწვრთნელმა თქვა, საშინაო მატჩები აუცილებლად უნდა მოვიგოთ.“ - განაცხადა ბასტიანმა.

რაც შეეხება ტრავმირებულებს, როგორც იცით, „იუნაიტედის“ ვარჯიში რამდენიმე ფეხბურთელმა გამოტოვა. ჰოლანდიელმა სპეციალისტმა გულშემატკივარი დაამშვიდა, რომ სერიოზული ტრავმა არცერთს აქვს.

„ერერას, კერიკს, ვალენსიას მცირე ტრავმები აქვთ, გადაწყვეტილების მიღება მომიწევს, შეიძლება ისინი მაინც ვათამაშო.“ - დაასრულა ვან გაალმა.

წყარო: manutd.com