სალამი ყველას!

სულ ახლახანს დავბრუნდი სახლში საუთჰემტონიდან და ძალიან ბედნიერი ვარ გამარჯვებით, რომელმაც მეორე ადგილზე გადაგვიყვანა. გუშინდელი გამარჯვებით ცუდად დაწყებული კვირა კარგად დავამთავრეთ. ყველამ კარგად ვიცოდით, თუ როგორი მნიშვნელოვანი იყო "სენტ მერიზე" გამარჯვება, რადგან ჩვენმა კონკურენტებმა შაბათს გამართულ შეხვედრებში ქულები დაკარგეს.

პირველ 30 წუთში მეტოქე უკეთესი იყო, მათ გაიტანეს გოლი და შექმნეს არაერთი სახიფათო მომენტი, თუმცა ძალები მოვიკრიბეთ და შესვენებამდე გათანაბრება მოვახერხეთ. მეორე ნახევარი უკეთ დავიწყეთ, შეხვედრის მიმდინარეობას მთლიანად ვაკონტროლებდით და ეს დაგვიფასდა, ანტონიმ თავისი მეორე გოლი გაიტანა, ხოლო ამის შემდეგ მეც მოვახერხე მეტოქის კარის აღება, შესანიშნავი გუნდური თამაშის შემდეგ, გატანილ გოლამდე ჩვენ 45 პასი გავაკეთეთ.

როგორც უკვე არაერთხელ ვთქვი, პრემიერ ლიგის თითქმის ყველა შეხვედრაში საფინალო სასტვენამდე უნდა ითამაშო, წინააღმდეგ შემთხვევაში დაისჯები. პელემ დუბლის გაფორმება მოახერხა და ამით "საუთჰემპტონის" ფეხბურთელებს მატჩის გადარჩენის იმედი მიეცათ. თუმცა დავიდმა კვლავ საუცხოოდ ითამაშა და კიდევ ერთხელ დაამტკიცა, თუ რატომ არის მსოფლიოს ერთ-ერთი საუკეთესო მეკარე.

მოკლედ რომ ვთქვათ, ეს იყო ძალიან საჭირო და მნიშვნელოვანი გამარჯვება. როგორც იცით შუა კვირის თამაში ძალიან ცუდი გამოდგა, გარდა იმისა, რომ დავმარცხდით, ლუკ შოუმ მიიღო უმძიმესი ტრავმა. მას ძალიან არ გაუმართლა, რადგან ორმაგი მოტეხილობა აღმოაჩნდა, მის ტკივილს ყველანი ვიზიარებთ.

სწორედ ამიტომ გვინდოდა, რაც შეიძლება მალე მიგვეძღვნა მისთვის გამარჯვება, რომელიც წამიერად მაინც გაამხიარულებდა. დარწმუნებული ვარ, ის უფრო ძლიერი დაბრუნდება და ყველაფერს გააკეთებს, რათა უმოკლეს დროში იყოს ჩვენთან ერთად. ლუკს სეზონის შესანიშნავი სტარტი ჰქონდა და ძალიან სასარგებლო იყო გუნდისთვის. ყველანი მოკითხვას გითვლით, ჩემო მეგობარო! იცი, რომ ჩვენ შენ გვერდით ვართ.

ბედნიერ კვირას გისურვებთ!

გეხვევით!

ხუანი