"მანჩესტერ იუნაიტედის" ნახევარმცველ ანდერ ერერას მიაჩნია, რომ ბრაიან რობსონის მოლოდინს გაამართლებს და მიმდინარე სეზონში შარშანდელთან შედარებით ორჯერ უკეთეს შედეგს აჩვენებს.

ესპანელმა "ლივერპულთან" მატჩში მიმდინარე სეზონში თავისი მეორე გოლი გაიტანა, ხოლო მანამდე ჩემპიონთა ლიგის საკვალიფიკაციო შეხვედრაში "ბრიუგეს" წინააღმდეგ მოახერხა თავის გამოჩენა.

"გასულ წელს რვაჯერ გავიტანე და გაზრდა მინდა. გუნდისთვის გოლების გატანის გაგრძელება მსურს. როცა ნახევარმცველი ხარ და გოლების დიდ რაოდენობას აგროვებ, ეს უკეთესს გხდის. ნახევარმცველისთვის ძალიან მნიშვნელოვანია და ვეცდები ეს გავაკეთო.

მინდა, მადლობა გადავუხადო ბრაიან რობსონს, თუ მას მიაჩნია, რომ 12 ან 15 გოლის გატანას მოვახერხებ, ეს ნიშნავს, რომ ჩემი სჯერა. საკუთარი თავის მეც მჯერა. ვფიქრობ, ამ რაოდენობის გოლებს გავიტან, მაგრამ ადვილი არ არის.

საგოლე სიტუაციებთან ახლოს უნდა ვიყო, რაც არის კიდეც ჩემი ვალდებულება. თუ გავიტან, უფრო ბედნიერი ვიქნები, მაგრამ გაცილებით მნიშვნელოვანია გატანისთვის მზადყოფნა - სწორედ ეს სურს მწვრთნელს ჩემგან. მას არ უნდა გოლის გატანა მთლიანად რუნის, მარსიალს, მემფისს ან სხვა შემტევებს დააკისროს. ყველა უნდა დაეხმაროს".

2014/15 წლების სეზონში "იუნაიტედის" მხოლოდ სამმა ფეხბურთელმა გაიტანა უფრო მეტი გოლი, ვიდრე ერერამ - უეინ რუნი (14), ხუან მატა (10), რობინ ვან პერსი (10) - ჰოლანდიელის ანგარიშზე "სენტ მერიზე" გატანილი ორი გოლიც ირიცხება, რომელმაც ვან გაალის გუნდს სამი ქულა მოუტანა. სწორედ იქ გამართავენ მომდევნო მატჩს "წითელი ეშმაკები".

"გასული წლის ორივე მატჩი მახსოვს "საუთჰემპტონთან", რომლებიც ცოტათი უცნაური იყო, რადგან გასვლაზე მოგებას არ ვიმსახურებდით, მაგრამ მაინც მოვიგეთ. სახლში წაგებას არ ვიმსახურებდით, მაგრამ მაინც წავაგეთ.

მათ წინააღმდეგ ორივე თამაში ძალიან რთული იყო, ამიტომ მზად უნდა ვიყოთ კიდევ ერთი ასეთისთვის. ბურთით თავდაჯერებულები არიან და ასე თამაშს შეეცდებიან, მაგრამ წინ გრაციანო პელე ჰყავთ, ამიტომ მაღალ ბურთზეც ითამაშებენ. მეორე სართულზე გუნდისთვის ბურთის შენარჩუნება შეუძლია, ამიტომ მათ თამაშის სხვადასხვა ვარიანტები აქვთ.

რა თქმა უნდა, ეს კარგი გუნდია, რადგან გასული სეზონი მე-7 ადგილზე დაასრულეს და ყოველთვის ვამბობ, რომ მოწინააღმდეგეებს პატივი უნდა ვცეთ. მაგრამ თუ ისეთი კარგი ვიქნებით, როგორიც შეგვიძლია ვიყოთ, მათ აუცილებლად დავამარცხებთ. თუ კარგ დონეზე ვართ, გამარჯვების შანსი ყოველთვის გვაქვს. ჩვენ "მანჩესტერ იუნაიტედი" ვართ და ეს უნდა ვაჩვენოთ", - განაცხადა ერერამ.

წყარო: manutd.com