ფრანგმა "მანჩესტერ იუნაიტედში" ლუი ვან გაალის ფილოსოფიის საიდუმლოებას ნათელი მოჰფინა.

მორგან შნეიდერლინი ვან გაალის "მზაკვრულ" გეგმაზე საუბრობს და გვაცნობებს, რომ გუნდს გამარჯვებისთვის ერთი გოლის გატანაც ეყოფა.

ვან გაალს "ოლდ ტრაფორდზე" მოსვლის პირველივე დღიდან იმ სტილის ფეხბურთისთვის აკრიტიკებდნენ, რომელსაც ამჯობინებდა. გულშემატკივარსა და ყოფილ ფეხბურთელებს სერ ალექს ფერგიუსონის ეპოქის სანახაობრივი ფეხბურთი ენატრება.

უეინ რუნი და მაიკლ კერიკი ჰოლანდიელს გასახდელში არსებული მოსაწყენი ატმოსფეროს გამო შესჩიოდნენ.



შნეიდერლინი "აიაქსის", "ბარსელონასა" და "ბაიერნის" ყოფილ მწვრთნელს "მძიმე" ადამიანად მოიხსენიებს. თუმცა მორგანმა ამის გარდა კარის "მშრალად" შენახვის მნიშვნელობაზეც ისაუბრა.

"ჩვენი დაცვა უნდა დავიცვა. მე და მაიკლ კერიკს მნიშვნელოვანი ვალდებულებები გვაქვს. მაიკლი შესანიშნავად მუშაობს ბურთთან და იცის, როგორ აკონტროლოს თამაში.

ჩვენ წინ მოქმედებს ოთხი დიდებული ფეხბურთელი, ამიტომ ჩვენი როლი მათ მხარდაჭერაში, ბურთის მიწოდებასა და მათთვის სასწაულების კეთების საშუალების მიცემაში მდგომარეობს.

დროთა განმავლობაში შორიდან კვლავ დავარტყამ, მაგრამ ჩვენთვის ყველაზე მთავარი - არ გაშვებაა. ეს ნიშნავს, რომ მხოლოდ ერთხელ გატანა გვჭირდება, რათა გავიმარჯვოთ".

"იუნაიტედმა" პრემიერ ლიგის 5 მატჩში მიმდინარე სეზონში მხოლოდ სამი გოლი გაუშვა. მაგრამ ვან გაალი კვლავ ვერ ახერხებს თავდასხმაში ისეთი მდგომარეობის შექმნას, როგორიც ფერგიუსონის დროს იყო.

რიო ფერდინანდმა განაცხადა, რომ თავის ყოფილ გუნდს ვეღარ სცნობდა.



"მანჩესტერ იუნაიტედის" ქომაგმა ხელახლა უნდა ისწავლოს კლუბის თამაშების ყურება. ნუ წახვალთ სტადიონზე გახსნილი, შემტევი, ემოციური ფეხბურთის ნახვის მოლოდინით".

ვან გაალი მორგანს ჩემპიონობისთვის ბრძოლაში მნიშვნელოვან ფიგურად მიიჩნევს. ჰოლანდიელმა არდადეგებიდანაც კი იხმო ფრანგი, რათა მისი ტრანსფერი დროულად გაეფორმებინა.

შნეიდერლინი ამტკიცებს, რომ ვან გაალის სტილი "ბარსელონას" სტილს ჰგავს, როგორც კუმანისას.

"ორივე მწვრთნელს სურს, რომ მათმა გუნდმა პირველ სართულზე იმოქმედოს, რაც მათი გამორჩეული მახასიათებელია. ბოლოს და ბოლოს, ისინი "ბარსელონას" იცნობენ როგორც მწვრთნელები და როგორც მოთამაშეები. ამიტომ სურთ, რომ მათმა ფეხბურთელებმა თამაში დაცვიდან ააგონ. რაც შეეხება ხალხთან ურთიერთობას, კუმანი უფრო რბილია, ვან გაალი კი მძიმე და დიდ დროს უთმობს ტაქტიკას. ჩავთვალე, რომ მწვრთნელთან დალაპარაკება მნიშვნელოვანია, სანამ ახალ კლუბს აირჩევ.

ერთმანეთს არდადეგებზე ჩემი ყოფნისას გავეცანით. საუბარი დაახლოებით ნახევარ საათს გაგრძელდა, მხოლოდ ფეხბურთზე ვლაპარაკობდით. უფრო პირადული შეკითხვები მოგვიანებით დაისვა, როცა შევხვდით. თავისი ჩანაფიქრები, ამბიციები ამიხსნა. თქვა, რომ ჩემი სათამაშო სტილი კლუბს ერგება. კიდევ აინტერესებდა, მზად ვიყავი თუ არა ამ ნაბიჯისთვის ფსიქოლოგიურად, რადგან ზეწოლა სახუმარო არ არის და სურდა გაეგო, რა მიდგომა მქონდა საქმესთან. საერთო ჯამში, მაჩვენა, რომ ჩემი სჯერა, მაგრამ, რა თქმა უნდა, ჩემთვის ძირითადში ადგილი არ გაუნაღდებია".

წყარო: M.E.N.