მოგეხსენებათ, 2015 წლის 1 სექტემბერს სატრანსფერო ფანჯრის ამოწურვამდე რამდენიმე წუთით ადრე ე.წ "დედლაინზე", "იუნაიტედმა" 17 წლის ცენტრალური მცველი, რეგან პული თავისუფალი აგენტის სტატუსით გადაიბირა.

რეგანი 1998 წლის 18 ივნისს უელსის ქალაქ კარდიფში დაიბადა. მისი საფეხბურთო კარიერა ადგილობრივ კლუბ "ნიუპორტის" საფეხბურთო სკოლაში დაიწყო. მისი დებიუტი პროფესიონალურ დონეზე გასული წლის ზაფხულს შედგა, როდესაც რეგანს 16 წელი შეუსრულდა. პირველივე სეზონში შთამბეჭდავი თამაშით რეგანმა ისეთი კლუბების ყურადღება მიიპყრო, როგორებიც "არსენალი", "იუნაიტედი", "სიტი" და "ტოტენჰემი" არიან.

რეგანისთვის პირველი საფეხბურთო სეზონი "ნიუპორტის" შემადგენლობაში შესანიშნავი აღმოჩნდა, რამეთუ მას პრიზად ხვდა ტიტული "წლის საუკეთესო მოთამაშე" გარდა ამისა, რეგანი "ნიუპორტის" ყველა დროის საუკეთესო ახალგაზრდა მოთამაშეთ დასახელდა.

რა თქმა უნდა, მის ასეთ მიღწევებს უკვალოდ არ ჩაუვლია. 2014 წლის ზაფხულს უელსის 17 წლამდელთა ნაკრების თავკაცმა, ჟერან უილიამსმა რეგანი ნაკრებში გამოიძახა და იმ დღიდან მოყოლებული გამართულ 6 შეხვედრაში ძირითად შემადგენლობაში გაამწესა.

ამ დროისთვის რეგან პულის საფეხბურთო კარიერა 15 მატჩს ითვლის, რომელშიც თავი ერთხელ გამოიჩინა.

რეგანი ამ დროისთვის "იუნაიტედის" რეზერვების წევრი გახლავთ, სადაც ალექს ტუანზებესთან და შონ უილიამსთან ერთად ერთ-ერთ საუკეთესო დაცვის ხაზს შექმნის. გარდა ამისა, შესაძლოა პოლ მაკგინესმა რეგანი იმ მოთამაშეების განაცხადში ჩასვას, რომლებიც 21 წლამდე ჩემპიონთა ლიგაზე იასპარეზებენ.