სატრანსფერო ფანჯარა რამდენიმე საათში იხურება. ორი აზრი არ არსებობს, რომ „იუნაიტედს“ თავდამსხმელი ჰყავს საყიდელი და ასეც მოიქცევა.

იმისთვის, რომ კლუბი ოთხეულში მოხვდეს, ჩემპიონთა ლიგაზე გავიდეს და ტიტულებისთვის იბრძოლოს, ტოპ კლასის თავდამსხმელი სჭირდება, რომელიც ირბენს, მოწინააღმდეგის მცველებს დაღლის და სივრცეებს გაათავისუფლებს. უეინ რუნი საოცარი ფორვარდია, მაგრამ არა ასეთი ტიპის.

იდეალური იქნება „იუნაიტედისთვისაც“ და რუნისთვისაც, თუ პრემიერ ლიგის განახლების შემდეგ უეინი წინა ხაზში ითამაშებს, თუმცა მის წინ კი ტიპიური 9 ნომერი იქნება. რუნი ოქტომბერში 30 წლის გახდება, მაგრამ ის ისევ უმაღლესი დონის თავდამსხმელია. ამ მომენტისთვის მას 75 გოლი უკლია პრემიერ ლიგის ყველა დროის საუკეთესო ბომბარდირობამდე და ფორმის შენარჩუნების შემთხვევაში, მას ამის გაკეთების შანსი ნამდვილად აქვს.

უეინმა „ბრიუგესთან“ კიდევ ერთხელ დაგვანახა, მომენტების როგორი კარგი შემსრულებელია. შეიძლება ამ მატჩმა თავდაჯერებულობა მისცა კიდეც, მაგრამ პრემიერ ლიგაში დაბრუნებულს არაფერი გამოსვლია - „სუონსისთან“ მატჩში ის ბურთს 39-ჯერ შეეხო, რაც ყველაზე დაბალი მაჩვენებელია მთელი გუნდიდან. ერთ-ერთ მომენტში მან არაფრიდან შექმნა მომენტი, მაგრამ ისევ თავდაჯერებულობამ უმტყუვნა.



რუნი ლიდერია და უდიდესი პრობლემა ის არის, რომ გუნდი მასზე, ლიდერზე არ არის მორგებული. როცა მას მწვრთნელი შესაბამის როლს მისცემს და წინა ხაზში ფეხბურთელს შეუწყვილებს, მაშინ გვექნება ბედნიერება ვისაუბროთ მასზე, როგორც მსოფლიო კლასის თავდამსხმელზე და არა როგორც მატჩის იმედგაცრუებაზე.
რა მოეთხოვება 9 ნომერს?

მომენტების გამოყენებასა და გოლების გატანასთან ერთად, 9 ნომერს სხვა ბევრი სამუშაო აქვს. მისი მთავარი მიზანი მოწინააღმდეგის დაცვითი ხაზის „ოკუპირებაა“.
როგორ ხდება ეს? მათი გაშლით და თავისუფალი ზონების შექმნით. ეს ხდება მცველებს უკან გარბენებით, როცა მოთამაშე არა საგოლე მომენტისთვის ემზადება, არამედ მათი ყურადღების გაფანტვას და ცენტრალური მცველების გადაშლას ცდილობს. ამით სივრცეები უკან მყოფ თავდამსხმელთან ერთად ვინგერებსაც ეხსნება.

ეს იყო სერ ალექს ფერგიუსონის სტრატეგია ორი ათწლეულის მანძილზე. მან უეინი „ათიანზეც“ კი დაწია და ინგლისელიც ამ გზით აგრძელებდა შორეულ დარტყმებს, ვინგერებისთვის ბურთის გადაწოდებებს და მისი მეწყვილე თავდამსხმელებისთვის უნაკლო საგოლე მომენტების შექმნებს. ფაქტია, მას თავდამსხმელებთან შეგუების კარგი უნარი აქვს, ისტორია და ციფრები ამას ნამდვილად ამტკიცებს - რუნიმ იდეალური დუეტი შექმნა ნისტელროისთან, ლუის საჰასთან, ტევესთან, ბერბატოვთან და ბოლოს რობინ ვან პერსისთან. სერ ალექსმა ზუსტად იცოდა რა სჭირდებოდა გუნდს რუნისგან, დევიდ მოიესმა ზუსტად იცოდა რა სჭირდებოდა რუნის და აძლევდა მისთვის სასურველ როლს, ვან გაალი კი დარწმუნებულია იმაში, რა სჭირდება თავის ფილოსოფიას უეინისგან.

BBC.COM