მარკოს როხომ განაცხადა, რომ სურს დარჩეს "მანჩესტერ იუნაიტედში". მაგრამ, როგორც ინგლისური პრესა აცხადებს, მის გაყიდვას "წითლები" სატრანსფერო ფანჯრის დახურვამდე აპირებენ.

მოგეხსენებათ, რომ როხო ამერიკაში წინასასეზონო ტურნეზე ვერ გაფრინდა. ეს ყველაფერი მოხდა იმის გამო, რომ დაავიწყდა პასპორტის მოქმედების ვადის გაგრძელება. ამის შემდგომ ის არამარტო დაჯარიმდა 140 000 ფუნტის ოდენობით, არამედ შემადგენლობაში ადგილიც დაკარგა. მიმდინარე სეზონში არგენტინელს ერთი წუთიც არ გაუტარებია მოედანზე. თუმცა ის აცხადებს რომ ყველა ეს პრობლემა წარსულში დარჩა.

"მე რამდენიმე შეთავაზება მივიღე სხვადასხვა კლუბისგან, მაგრამ ჩემი მთავარი მიზანი ახლა "იუნაიტედში" დარჩენა და მინდორზე ადგილისთვის ბრძოლაა, იმიტომ რომ ეს შესანიშნავი კლუბია. ვეცდები, რომ რაც შეიძლება მეტი ვითამაშო."

"დაბრუნების შემდეგ ვან გაალს ვესაუბრე. რა თქმა უნდა, ის ძალიან გაბრაზებული იყო ყველაფერ იმის გამო, რაც მოხდა, მაგრამ ისიც მითხრა, რომ ჩემზე გათვლებს აკეთებს."

"ვან გაალი ძალიან ძლიერი პიროვნებაა. თითოეული ჩვენგანისგან ის ბევრს ითხოვს და მინდორზე მაქსიმუმს მოელის. მან განმიცხადა რომ შემადგენლობაში ადგილის დასაკავებლად ბლინდთან მომიწევს ბრძოლა. თუმცა მე ასევე შემიძლია მარცხენა ფლანგზე თამაში, სადაც რამდენიმე მატჩი უკვე ჩავატარე გასულ სეზონში",-აცხადებს როხო.

წყარო: ManUtd.ru