ფეხბურთის გულეშემატკივართა უმრავლესობა მიიჩნევდა, რომ სწორედ უელსში გასამართი მატჩი იქნებოდა "იუნაიტედისთვის" მიმდინარე სეზონში პირველი გამოცდა. მათთან შეკამათება ძნელია - გარი მონკის შეგირდებმა თავიანთი კონტრშეტევებზე აწყობილი თამაშით იდეალურად გამოიყენეს მეტოქის სუსტი წერტილები და არ მისცეს "ეშმაკებს" საშუალება კომბინაციური და სწრაფი თამაში ეჩვენებინათ.

შემადგენლობები

"მანჩესტერ იუნაიტედის" შემადგენლობაში ამჯერად პირველივე წუთებიდან 10-იანის პოზიციაზე მოგვევლინა ანდერ ერერა, ხოლო მის უკან ბასტიან შვაინშტაიგერი და მორგან შნეიდერლინი მოქმედებდნენ. დანარჩენ პოზიციებზე უცვლელი წევრები მოქმედებდნენ. "გედებმა" მატჩის დაწყებამდე ყურადღება იმით მიიქციეს, რომ განაცხადს მიღმა დარჩა მონტერო - მისი ადგილი როუტლიჯმა დაიკავა.



შეცდომები

1. აიუ ბლინდის ზურგს უკან აკეთებს გადაცემას, რომელიც გომისს მისდის, ფრანგი შემტევი ბურთს იღებს და საჯარიმოს კუთხიდან არაზუსტად ურტყამს. ბლინდის პოზიციური შეცდომის გარდა იმაზეც უნდა გავამახვილოთ ყურადღება, რომ შეტევა შვაინშტაიგერის მიერ დაკარგვას მოჰყვა.



2. "სუონსის" მოთამაშეები სტანდარტს ორიგინალურად ითამაშებენ- ბურთი მისდის გომისს, რომელიც ერთი შეხებით, ქუსლით პუოლობს სიდგინრსონს - ისლანდიელის დარტყმული სანტიმეტრებით ცდება შორეულ ძელს. უჩვეულოდ გათამაშებული ბურთი ვერანაირად ვერ ამართლებს შოუსა და შნეიდერლინს, რომლებმაც ვერ მოახერხეს გომისის განეიტრალება, ასევე ბლინდს, რომელმაც სიდგურსონს მისცა ბურთის მიღების საშუალება.



3. ისევ გომისი და კვლავ შელვის გადაცემა აღწევს ადრესატამდე. ფრანგი რთული ვითარებიდან თავის დაღწევას მაინც ახერხებს და ამჯერად თავად ურტყამს კარში, ბურთი ძელს ხვდება. დაუჯერებელია, თუ რა მარტივად ჩამოიშორა შემტევმა ბლინდი და გავიდა დასარტყმელ პოზიციაზე.



4. პოზიციურ შეტევაში კიმ (რომელიც როუტლიჯის ნაცვლად შემოვიდა) და სიდგურსონმა მარჯვენა ფლანგზე ბურთი გაითამაშეს, ამ ეპიზოდში აზიელის ერთმა პასმა ერთბაშად "იუნაიტედის" 4 მოთამაშე დატოვა უსაქმოდ. ამ დროს საჯარიმოში დარმიანმა და სმოლინგმა, რომლებიც არ დაელოდნენ ნახევარმცველების დახმარებას, ცოტა არ იყოს არასწორი პოზიციები შეარჩიეს: სიდგურსონის ჩაწოდების შემდეგ აიუ სრულიად მარტო დარჩა, ხოლო გომისმა თითქმის გაასწრო სმოლინგს და ისიც ხელსაყრელ სიტუაციაში აღმოჩნდა. დაუჯერებელია, თუ როგორ ვერ გამოიყენეს სტუმრებმა ეს მომენტი.





გოლები

1. შოუს ეპიზოდის დასაწყისში ძალიან უმართლებს და ასხლეტის შედეგად "სუონსის" სამ მოთამაშეს იტოვებს ზურგს უკან. საჯარიმოსთან მიახლოებული ინგლისელი მცველი არცთუ კომფორტულ გადაცემას უკეთებს რუნის, უეინმა ბურთი გაატარა, რასაც არ ელოდა უილიამსი, თუმცა პირიქით მზად იყო მატა, რომელიც ახლო მანძილიდან იღებს თითქმის დაუცველ კარს.



2. საგოლე შეტევა რუნის არაზუსტი გადაცემით იწყება, პასს უილიამსი ჭრის. მიაქციეთ ყურადღება შოუს, თუ რამდენად ნელა ბრუნდება იგი უკან - 6 წამში იგი მხოლოდ 20-25 მეტრს ფარავს. უელსელთა კაპიტანი სიდგურსონს ამარაგებს გადაცემით, რომელსაც შოუს წინ წასვლის გამო უზარმაზარი თავისუფალი სივრცე აქვს. ისლანდიელზე ბლინდი ამოდის, რომელიც კრის სმოლინგს პრაქტიკულად მარტო ტოვებს ორი შემტევის წინააღმდეგ: აიუ და გომისი. გადაცემა პირველ მათგანზე კეთდება, შნეიდერლინი მცველთა დაზღვევას ვერ ასწრებს, რომერო ბურთს ვერ შეწვდა.





3. შელვის გადაცემა სიდგურსონის გავლით აიუს მისდის. განელი შემტევი იდეალურ და ძალიან ლამაზ პასს უკეთებს გომისს, ''ლიონის'' ყოფილი თავდამსხმელი ერთი შეხებით ბურთს იღებს ხოლო მეორეთი ურტყამს. ბურთი რომეროს ფეხსა და ხელს შორის ძვრება. კვლავ გაამახვილეთ ყურადღება შოუზე და მის ნელ მოქმედებებზე: მართალია, ამჯერად მისი ხსენებული ქმედება გოლის გაშვების მთავარი მიზეზი არ იყო, თუმცა სწორედ ამან გამოიწვია დარმიანის მრჯვნიდან ცენრში შემოწევა, რადგან ბლინდი აიუსთვის ბურთის ასართმევად გაემართა. შექმნილი სიტუაციით ისარგებლა შელვიმ, რომელმაც უბრალო ჩარბენი გააკეთა საჯარიმოში და სრულიად დაუცველი გახლდათ. აღვნიშნოთ სმოლინგიც, რომელსაც გამოეპარა მხედველობიდან გომისის ჩარბენი, ეს ინგლისელის პირველი სერიოზული შეცდომაა მიმდინარე სეზონში.





გმირი

სტუმართაგან რომელიმე მოთამაშის გამორჩევა გუშინდელი შეხვედრის შემდეგ მარტივად რომ ვთქვათ, რთულია - მთელი გუნდის თამაში საშუალოზე დაბალით ფასდება. გამოვყოფდი ერერას - ესპანელი თითქმის შეუმჩნეველი იყო, თუმცა თითქმის ყველა სახიფათო შეტევაში მონაწიეობა მიიღო. ათიანი - ეს იდეალური პოზიციაა ბასკისთვის, თუმცა, როგორც ჩანს, ვან გაალი მის გამოყენებას უმეტესად მოედნის ცენტრში აპირებს, სადაც ერერა არცთუ კარგად გამოიყურება.



რეზიუმე

ვან გაალის გუნდმა კვლავ ვერ მოახერხა უელსურ გუნდთან გამკლავება. მატჩმა "იუნაიტედის" თითქმის ყველა სუსტი წერტილი გამოაჩინა - თუმცა არ დაგავიწყდეთ, რომ დეპაი ჯერ კიდევ კარგად უნდა შეეგუოს გუნდს, ბლინდი ცენტრალური მცველი არ არის, ხოლო რომერო ვერ გახდება დე ხეა. შესაძლოა, ჩამონათვალი კიდევ გაგრძელდეს, მაგრამ პრობლემები დროის გასვლასთან ერთად მოგვარდება. თუმცა არსებობს პრობლემები, რომლებიც მხოლოდ ტრანსფერებით თუ გადაიჭრება.