ლუი ვან გაალმა აღიარა, რომ იგი ბედნიერია ჩემპიონთა ლიგის კენჭისყრის შედეგებით, რომლის მიხედვითაც, "იუნატედის" ჯგუფში "პსვ ეინდჰოვენი", "ცსკა მოსკოვი" და "ვოლფსბურგი" იქნებიან.
ჰოლანდეილ მენეჯერს გარკვეული კავშირი აქვს "პსვ"-სთან, სწორედ ერედივიზიონის ჩემპიონი გუნდიდან შეიძინეს "წითლებმა" მემფის დეპაი. ასევე ბევრის აზრით, დიდი სირთულე იქნება შუა კვირაში მოსკოვში გაფრენა, რამაც შეიძლება ცუდი გავლენა იქონიოს გუნდზე.
"შეიძლებოდა უკეთესიც ყოფილიყო ან უარესიც." - განაცხადა ბოსმა. "ახლა საჭიროა, კლუბებს თვალყური ვადევნოთ, რადგან დიდი მნიშვნელობა აქვს, როგორ ფორმაში არიან ისინი ამ მომენტში. ჩემი სკაუტი, მარსელ ბოუტი აპირებს დაესწროს "პსვ"-სა და "ვოლფსბურგის" თამაშებს. "პსვ"-ს შემდეგი მეტოქე "ფეინოორდია", რომელიც ჰოლანდიაში საკმაოდ მნიშვნელოვანი მატჩი იქნება - ამ ყველაფრის ანალიზი მოგვიწევს."
ჟურნალისტებმა ვან გაალს ჰკითხეს, ელოდებოდა თუ არა ეინდჰოვენში მტრულ გარემოს. "არა მგონია, რომ მტრული გარემო დაგვხვდეს." - განაცხადა მენეჯერმა. "პსვ"-ს ხელმძღვანელობაში ბევრი მეგობარი მყავს, რამდენიმესთან ერთად "ალკმაარშიც" ვმუშაობდი."
"მემფისიც მათგან შევიძინეთ, მას შესანიშნავი კარიერა ჰქონდა "პსვ"-ს შემადგენლობაში. ამიტომ არ მგონია, რომ მის მიმართ მტრულად იქნებიან განწყობილები. მათ მოგება სურთ, ამიტომ დამატებითი მოტივაცია ექნებათ. ვალდებულები ვართ, ამ წინააღმდეგობას გავუმკლავდეთ. ბევრ ფეხბურთელს პერსონალურად ვიცნობ, ჩემთვის ეს ძველ მეგობრებთან შეხვედრას ჰგავს."
"მოსკოვში ერთხელ უკვე ნათამაშები მაქვს, "ლოკომოტივის" წინააღმდეგ. მგზავრობა არც ისეთი გრძელია, როგორც ბევრი ფიქრობს. ეს მხოლოდ 3-4 საათის გზაა და ფრენის პირობები ყოველთვის მაღალი დონისაა. შეიძლებოდა, უარესი ვარიანტიც შეგვხვედრილიყო."
მოგეხსენებათ, რომ მორგან შნეიდერლინისთვის ეს იქნება პირველი ევროპული გამოცდილება. თუმცა ფრანგი დარწმუნებულია, რომ იგი გუნდთან ერთად წარმატებულად შეძლებს ევროპის ყველაზე პრესტიჟულ ტურნირზე ასპარეზობას.
"ჩვენთვის მნიშვნელოვანია, რომ ჯგუფურ ეტაპზე წარმატებულად გამოვიდეთ." - განაცხადა შნეიდერლინმა. "თუ ამას გავაკეთებთ, შემდეგ ეტაპზე დიდ გუნდებთან მოგვიწევს დაპირისპირება. როცა ამის დრო მოვა, ყველაფრისთვის ვიქნებით მზად. ჩვენ "მანჩესტერ იუნაიტედი" ვართ და ჩვენ არავისი არ გვეშინია."