გილოცავ, ლუი, ერთ-ერთი მთავარი მიზანი მიღწეულია. ბედნიერი ხართ?

მე ძალიან ბედნიერი ვარ, რადგან როგორც უკვე აღნიშნეთ, გასული სეზონიდან მოყოლებული ჩემპიონთა ლიგაზე მოხვედრა ჩვენი მთავარი ამოცანა იყო. ჩვენ ეს შევძელით დღეს, ძალიან კარგი თამაშის ფონზე, ამიტომ ორმაგად გახარებული ვარ.

როგორ წაადგება ეს გამარჯვება გუნდს, შემატებს მას თავდაჯერებულობას?

(იღიმის) ჩვენ ისედაც გვჯერა. არ მგონია, რომ დღევანდელმა გამარჯვებამ რამე შეცვალოს. ჩვენ მეტი მოგებები გვჭირდება, ასეთი სცენარით. კარი მშრალად შევინახეთ, შევქმენით ძალიან ბევრი მომენტი, რა თქმა უნდა, ეს "ბრიუგეს" დამსახურებაცაა, რადგან ისინი შეტევაში მიდიოდნენ და თავისუფალ, დაუცველ ზონებს ტოვებდნენ, რომლებსაც იდეალურად ვიყენებდით. თუცმა, ამ ყველაფერსაც შესრულება უნდა, ადვილი ნამდვილად არ არის, როგორც ბევრი ფიქრობს.

ლუი, 2011 წელს თქვენ უკანასკნელად ჩაატარეთ ჩემპიონთა ლიგის ჯგუფური ეტაპის მატჩი. როგრო ფიქრობთ შეიცვალა, მას შემდეგ ეს ტურნირი?

ამ ეტაპზე განსჯა არ შემიძლია, რადგან 3 წელია ტურნირში მონაწილეობა არ მიმიღია. რა თქმა უნდა, ტელევიზორში მატჩებს თვალს ვადევნებდი, თუმცა განსჯა არ შემიძლია. ვფიქრობ, უმნიშვნელოვანესი საკლუბო ტურნირია, ასე იყო 10-20 წლის წინათაც. ეს არის ყველაზე მთავარი ტურნირი, სადაც შეგიძლია წარმოაჩინო შენი შესაძლებლობების მაქსიმუმი.

ლუი, რა შეგიძლიათ თქვათ უეინ რუნის ხასიათთან დაკავშირებით? მას კრიტიკის ქარ-ცეცხლში გავლა მოუწია მიმდინარე სეზონში, დღეს კი საოცრად ითამაშა...

დიახ, მაგრამ მე მისი ყოველთვის მჯეროდა. თუმცა ეს სჭირდებოდა თავად ფეხბურთელს. ვფიქრობ, უეინს ძალიან ძლიერი ხასიათი აქვს. ასეთი დონის მოთამაშეს ყოველთვის აკრიტიკებენ, თუმცა მან დღეს დაამტკიცა, თუ რა შეუძლია. თუმცა მას კიდევ გრძელი გზის გავლა მოუწევს, ისევე როგორც მთლიანად "მანჩესტერ იუნაიტედს". ეს ადვილი არ იქნება, მაგრამ მე მჯერა მისი.

ლუი, გილოცავთ! "ბრიუგე" ბელგიის ჩემპიონატის მეორე ადგილოსანი გუნდი იყო, გასული სეზონის შედეგებით. ახლა თქვენ შესაძლოა, კიდევ ერთ ბელგიურ გუნდს, "გენტს" შეხვდეთ ჯგუფურ ეტაპზე. ისურვებდით მათთან გაჯიბრებას?

(იცინის) თუ არ ვცდები, მე უკვე ვითამაშე "გენტის" წინააღმდეგ, როდესაც "აიაქსს" ვწვრთნიდი, გახსოვთ შედეგი?

არ მახსოვს...

კარგი, ჩვენ მოვიგეთ.

ლუი, თქვენთვის აქვს მნიშვნელობა ვისთან ერთად იასპარეზებთ ჯგუფში?

რა თქმა უნდა.

ვის ისურვებდით ჯგუფში?

მე არ ვიცი ის გუნდები, რომლებიც მონაწილეობას იღებენ წლევანდელ გათამაშებაში, თუმცა ასეც რომ არ იყოს, მე ხომ ვერანაირ გავლენას ვერ მოვახდენ კენჭისყრაზე. ერთ-ერთმა ჟურნალისტმა მკითხა, ვუყურებდი თუ არა კენჭისყრის ცერემონიას, მე კი ვუპასუხე რომ არა, რადგან რეზერვების გუნდი, რომელშიც ჩემი 8 მოთამაშეა "აიაქსს" დაუპირისპირდება და ეს ჩემთვის ბევრად მნიშვნელოვანი "ღონისძიებაა".

ანდერ ერერა მიმდინარე სეზონში პირველად იყო ძირითად შემადგენლობაში. რას იტყვით მის თამაშზე?

სტარტი არცთუ კარგი ჰქონდა, ხშირად კარგავდა ბურთს, ყვითელი ბარათიც დაიმსახურა, ამიტომ მე მის შეცვლას ვაპირებდი. შემდეგ დავინახე გამოსწორებული თამაში. ამის შემდეგ იგი 10-იანის პოზიციაზე დადგა, სადაც ნამდვილად კარგად ითამაშა და მე მისი ასპარეზობითაც გახარებული ვარ.