ლუი ვან გაალმა "ტოტენჰემთან" მატჩის შემდეგ ჟურნალისტებთან ვრცლად ისაუბრა, სადაც უამრავ თემას შეეხო.

გუნდის თამაშზე:

ეს ძალიან რთული მატჩი იყო. მოედანზე გამოდიოდა ორი ისეთი კლუბი, რომელთაც პრესინგის თამაში სურდათ, ამიტომ ბურთი ძალიან სწრაფად იკარგებოდა. ჩვენ ბურთს ხანგრძლივი პერიოდით ვერ ვინარჩუნებდით, მაგრამ მუდმივი მოძრაობის საშუალებით რამდენიმე სახიფათო მომენტი შევქმენით. ვერ ვიტყოდი, რომ მეტოქის ზეწოლას გავუძელით, მაგრამ მათი კარის აღების საშუალება მივიღეთ. სახიფათო მომენტი პირველად "ტოტენჰემმა" შექმნა. კრისტიან ერიქსენს რომ გაეტანა, ალბათ, თამაში სრულიად სხვაგვარად წარიმართებოდა. სწორედ ამის გამო, ძალიან ბედნიერი ვარ.

ახალწვეულების მიერ შეტანილ წვლილზე:

"ოლდ ტრაფორდზე" პირველად გამოსვლა ისეთი გულშემატკივრების ქომაგობის ფონზე, რომლებიც კლუბს მხურვალედ ქომაგობენ, ძალიან რთულია. მემფისს ვუთხარი, რომ ზეწოლასა და ენთუზიაზმს არ უნდა აჰყოლოდა და ეს მთელ გუნდს ეხება. ძალიან მომეწონა მატეო დარმიანის თამაში. ის მეტოქის ნახევარზე ძალიან კარგად გადადიოდა და ბურთს თითქმის არ კარგავდა. მე თუ ვინმე გუნდიდან ფეხბურთელის გამოყოფას მთხოვს, იტალიელს გამოვარჩევდი, რადგან დღეს ის საუკეთესო იყო.

სერხიო რომერომ კარის "მშრალად" შენახვა შეძლო და თამაშის მიწურულს რამდენიმე კარგი სეივი გააკეთა, თუმცა რამდენიმე მომენტში არცთუ ისე კარგი იყო. პრინციპში ეს გასაგებია, რადგან მან ჩვენს ბიჭებთან ერთად პირველად ითამაშა და ის გუნდში 1 კვირის წინ მოვიდა. ასე რომ, ჩვენ მის ადაპტაციის პერიოდს დაველოდებით. ოთხშაბათს შტაბში გადავწყვიტეთ, რომ "ტოტენჰემთან" დე ხეას არ უნდა ეთამაშა და დავიდს ამის შესახებ ხუთშაბათს ვუთხარით. ამიტომ სერხიომ გუნდთან ერთად გაძლიერებული პროგრამით მხოლოდ ორი დღის განმავლობაში ივარჯიშა.

დე ხეას სიტუაცია:

გულშემატკივრებმა დავიდი კლუბის საუკეთესო მოთამაშედ ზედიზედ 2-ჯერ დაასახელეს, ამიტომ მას ასე ადვილად არ დავთმობთ. ჩვენ ფეხბურთელის შესაძენად დიდი თანხა გადავიხადეთ და გაყიდვის შემთხვევაშიც ასე მოვიქცევით. თუმცა, რა თქმა უნდა, მისი შენარჩუნება ძალიან გვინდა. მეკარემ კონცენტრაცია მთელი 90 წუთის განმავლობაში უნდა დაიცვას, თუმცა დავიდისთვის ამჟამად ამის გაკეთება ადვილი არ არის. ჩვენ კარგად ვნახეთ მისი თამაში წინასასეზონო ტურნეზე. სიტუაცია 1 სექტემბრამდე ნათელი გახდება და ჩვენ ამ საკითხს კიდევ შევეხებით.

"ოლდ ტრაფორდის" ატმოსფეროს შესახებ:

ბასტიან შვაინშტაიგერს დიდი გამოცდილება აქვს, თუმცა ისეთი მხარდაჭერითა და აპლოდისმენტებით, როგორიც მან დღეს "ოლდ ტრაფორდზე" მიიღო, არასდროს დასაჩუქრებულა. ვფიქრობ, ამან ის გაანერვიულა, მაგრამ დღეს ყველა ახალწვეულმა ნერვიულობა დაამარცხა.

64-ე დაბადების დღე:

დღევანდელი მატჩის ჩემთვის განსაკუთრებული იყო, რადგან დღეს ჩემი დაბადების დღეა და მატჩს შვილები და შვილიშვილები ესწრებოდნენ. ამ მატჩში რომ დავმარცხებულიყავით, დღევანდელ დღეს უიღბლო დღედ გამოვაცხადებდი. ამიტომ ძალიან კმაყოფილი ვარ. დღეს ჩემს საყვარელ რესტორანში შესანიშნავი საღამო მელოდება. იცით, რომ "ბითლზს" ასეთი სიმღერა აქვს? "როდესაც მე 65-ს ვიყავი,"

წყარო: Manutd.ru