როგორც მოგეხსენებათ, გუშინ "მანჩესტერ იუნაიტედმა" მეხუთე ახალწვეული წარადგინა. "ეშმაკებმა" თავისუფალი აგენტი, არგენტინისა და "სამპდორიის" კარის დარაჯი სერხი რომერო დაიმატეს. რომერო ვან გაალისთვის უცნობი მოთამაშე ნამდვილად არ არის, მათ ერთად "ალკმაარშიც" უმუშავიათ.

აი, რას ამბობს ჰოლანდიელი შეგირდზე:

"სერხიო რომერო არგენტინელი მეკარეა, თუმცა მე მას "ალკმაარიდან" ვიცნობ. მე ის სწორედ ჰოლანდიაში გავიცანი, თუმცა მაშინ ძალიან ახალგაზრდა იყო, სულ რაღაც 19 წლის. იგი ძალიან ნიჭიერი მეკარეა, ჩვენ ერთად ჩემპიონები გავხდით ჰოლანდიაში. თანაც არცთუ ვარსკვლავური გუნდით, ეს "ალკმაარისთვის" ფანტასტიური შედეგი იყო.

მე მას ძალიან კარგად ვიცნობ და ვფიქრობ, ჩვენს სიტუაციაში, როდესაც არ ვიცით, დარჩება თუ არა დე ხეა კლუბში, მისი დამატება დროული და გამართლებულია. პირველი მეკარის დაკარგვა ძალიან მტკივნეულია და ეს თუ მოხდა, მზად უნდა ვიყოთ. მიხარია, რომ ჩვენ ისევ ერთად ვიმუშავებთ, ახლა უკვე "მანჩესტერ იუნაიტედში".

კითხვაზე, თუ რა მოსწონს ყველაზე მეტად რომეროში, ვან გაალმა ასეთი რამ განაცხადა:

"ის მეკარეა და სეივებს აკეთებს, ეს ხომ ამ პოზიციის მოთამაშისთვის მთავარი ამოცანაა. ამასთან, იგი კარგად თამაშობს ფეხით, რაც დიდი პლუსია, რადგან ჩვენ სწორედ ასეთი კიპერი გვჭირდება. მას არც აღნაგობა და ფიზიკური კონდიციები დაეწუნება.

ჰოლანდიაში იგი საჯარიმოში დომინირებდა, თუმცა არ ვიცი, რა მოხდება პრემიერ ლიგაში, რადგან ეს ორი ჩემპიონატი ერთმანეთისგან განსხვავდება. იგი ფიზიკურად ძლიერია და თავდაჯერებული, ეს მისასალმებელია. მან ძალიან კარგი მსოფლიო ჩემპიონატი ჰქონდა, ჩვენ (ჰოლანდიის ნაკრების) წინააღმდეგ მან საუცხოოდ ითამაშა, მან რამდენიმე თერთმეტმეტრიანის მოგერიება მოახერხა."