გუშინ "მანჩესტერ იუნაიტედის" მთავარმა მწვრთნელმა სიეტლში, სადაც გუნდი წინასასეზონო მოსამზადებელ ეტაპს გადის, პრეს-კონფერენცია ჩაატარა და ახალწვეულები წარადგინა, თუმცა ჰოლანდიელ სპეციალისტს ტრანსფერების გარდა ლაპარაკი სხვა რამეზეც მოუწია, კერძოდ ,ტურნეს განაცხადში ვერ მოხვედრილ ვიქტორ ვალდესზე.

ვან გაალმა ვიქტორი არასწორი ქცევებისთვის გააკრიტიკა და ისიც დააანონსა, რომ ახალ სეზონს ესპანელი კიპერი სხვა გუნდში დაიწყებს:

"გასულ წელს მან იუარა რეზერვებში თამაში, რაც მიუღებელია ჩემთვის, ასევე იყო რამდენიმე ასპექტი, რაც არ მესიამოვნა.

როდესაც წესებს არ ემორჩილები, მხოლოდ ერთი გზაა დარჩენილი - წასვლა. ვიქტორი ჩემს ფილოსოფიას არ მიჰყვა, ჩემს გუნდში კი ასეთების ადგილი არ არის."

ამით ყველაფერი არ დამთავრებულა, სულ რამდენიმე საათის წინ ვალდესმა საკუთარ ინსტაგრამის გვერდზე სურათი გამოაქვეყნა წარწერით: ".....? #respect" რითიც, სავარაუდოდ, პატივისცემას მოითხოვდა. ასევე სურათებზე მოცემულია ის შეხვედრები, რომლებიც ვიქტორმა 21-წლამდე გუნდში ჩაატარა და ამით ხაზი გაუსვა, რომ იგი არ ამბობდა უარს იქ ასპარეზობაზე.