"მანჩესტერ იუნაიტედის" ყოფილი თავდამსხმელი, დიეგო ფორლანი აცხადებს, რომ კლუბმა დი მარიას შემთხვევაში შეუპოვრობა უნდა გამოიჩინოს.

არგენტინელმა ნახევარმცველმა ნაკრების რიგებში კოპა ამერიკაზე ფორმა აღიდგინა და პარაგვაის ნაკრების წინააღმდეგ ორ გატანილ გოლთან ერთად საგოლე გადაცემაც მიითვალა.

დი მარიამ არგენტინის ნაკრების ხუთივე თამაში სასტარტო შემადგენლობაში ჩაატარა და მის ანგარიშზე ტურნირზე გაკეთებული სამი საგოლე გადაცემაა.

"იუნაიტედის" მეორე სამხრეთ ამერიკელი შენაძენი, ფორლანი, რომელსაც ხუან სებასტიან ვერონისა და რადამელ ფალკაოს მსგავსად "ოლდ ტრაფორდზე" თავის გამოჩენა არ გამოუვიდა, მიიჩნევს, რომ თუ "იუნაიტედი" დი მარიას შეინარჩუნებს, მისგან აუცილებლად მიიღებს სარგებელს.

"ვფიქრობდი, რომ დი მარია სუპერ შენაძენი იყო, რადგან მსოფლიოს ერთ-ერთი საუკეთესო მოთამაშეა, მაგრამ მეც გაკვირვებული დავრჩი.

ლუი ვან გაალი არასდროს სწყალობდა სამხრეთ ამერიკელ ფეხბურთელებს და მათი გულშემატკივარიც არასდროს ყოფილა, ამას ჩემი მეგობარი, ხუან რომან რიკელმეც დაგიდასტურებთ, რომელიც "ბარსელონაში" ვან გაალთან ერთად მუშაობდა.

როცა ვან გაალი "ბაიერნში" მივიდა, იქიდანაც გაუშვა სამხრეთ ამერიკელი მოთამაშეები, თუმცა რადამელ ფალკაო და დი მარია "იუნაიტედში" დიდი თანხის სანაცვლოდ შეიძინა.

ფეხბურთელები რობოტები არ არიან და თუ რაღაც ცუდი მოხდება, მწვრთნელებმა უნდა აღმოაჩინონ პრობლემა. დი მარიას ნდობა ღირს. ის თითქმის ყველა სხვა ფეხბურთელისგან განსხვავებულ რამეს გვთავაზობს.

მადრიდის "რეალს" გასულ სეზონში დი მარიას სისწრაფე აკლდა. ანხელი სწრაფია, საგოლე გადაცემების გაკეთება შეუძლია და ფეხბურთში ყველაზე რთულ რამეს ახერხებს - მეტოქეს ერთი-ერთზე ატყუებს.

"იუნაიტედი" ინანებს თუ გაუშვებს. კიდევ ერთი სეზონი უნდა მიეცეს დამტკიცებისთვის, კლუბმა კი მისი უკეთ უნდა ირწმუნოს და ენდოს.

დიდებული ფეხბურთელები და დიდებული მწვრთნელები ერთამენთს ყოველთვის ვერ ეწყობიან, თანაც ყველა მოთამაშე ვერ ერგება სისტემას, მაგრამ დი მარიას შემთხვევაში სიჯიუტის გამოჩენა ღირს", - განაცხადა დიეგო ფორლანმა.

წყარო: M.E.N.