ბევრი გულშემატკივარისთვის როი კინი "მანჩესტერ იუნაიტედის" ოთხმოცდაათიანი წლებისა და საუკუნის შეცვლის პერიოდის წარმატებებთან ასოცირდება.

"ოლდ ტრაფორდზე" გატარებული 12 წლის განმავლობაში კინმა პრემიერ ლიგის შვიდი, ასოციაციის ოთხი და ჩემპიონთა ლიგის ერთი ტიტული მოიგო.

მაგრამ ირლანდიელმა აღიარა, რომ "წითელი ეშმაკების" გულშემატკივარი არასდროს ყოფილა და ბავშვობიდან "ტოტენჰემს" უჭერდა მხარს.

"არც კი მგონია, რომ "მანჩესტერ იუნაიტედის" გულშემატკივარი ვიყავი, როცა მათთვის ვთამაშობდი.

გინდ დაიჯერეთ, გინდ არა, "დეზებს" ვქომაგობდი და ღმერთმა იცის, რატომ. მაგრამ არა, "იუნაიტედის ქომაგი" გადაჭარბებული ნათქვამია.

მხოლოდ იმიტომ, რომ "იუნაიტედში" ვთამაშობდი, მათი გულშემატკივარი ვერ ვიქნებოდი, მაგრამ, რა თქმა უნდა, "ლივერპულთან" რომ ჰქონოდა თამაში, "იუნაიტედის" გამარჯვება მენდომებოდა.

მაგრამ, როცა კლუბი დავტოვე, კავშირიც გავწყვიტე".

კინმა ასევე განაცხადა, რომ ბავშვობაში მას შეეძლო "ტოტენჰემის" ფეხბურთელი გამხდარიყო.

"როცა "როკმაუნთში" ვთამაშობდი, ჩემი ერთ-ერთი თანაგუნდელის მამამ ვარჯიშებზე წამიყვანა და ის "ტოტენჰემის" გულშემატკივარი იყო. ალბათ, აქიდან დაიწყო. მათი მოთამაშეები, გლენ ჰოდლი და კლაივ ალენი მომწონდა.

მაგრამ, სანამ "ნოტინგემ ფორესტში" გადავიდოდი, "ტოტენჰემმა" შემომთავაზა კონტრაქტი, თუმცა "ფორესტი" უკეთესი იყო ჩემთვის, მომწონდა ეს კლუბი და მისდამი ლოიალურად ვიყავი განწყობილი".

წყარო: goal.com