ჯეიმი კარაგერს მიაჩნია, რომ "მანჩესტერ იუნაიტედი" ვერ შეიძენს უკეთეს მცველს, ვიდრე სერხიო რამოსია.

პრესა ირწმუნება, რომ ლუი ვან გაალი 29-წლის მცველის შეძენას ეცდება და შესაძლოა ის დავიდ დე ხეას ტრანსფერშიც კი ჩართონ.

"მანჩესტერ იუნაიტედს" დაცვის ცენტრალურ პოზიციაზე პრობლემები აქვს, ამიტომ ვან გაალს სიტუაციის გამოსასწორებლად გამოცდილი მცველი სჭირდება. სავარაუდო კანდიდატებად მატს ჰუმელსი, ნიკოლას ოტამენდი და სერხიო რამოსი განიხილებიან, "ლივერპულის" ყოფილ ფეხბურთელს კი მიაჩნია, რომ მათ შორის ესპანელ მცველს ვერავინ შეედრება.

"ცოტა გაკვირვებული ვარ კრიტიკით, რომელსაც რამოსი იღებს. მან ყველაფერი მოიგო, მსოფლიოს ერთ-ერთ საუკეთესო კლუბში თამაშობს და ერთ-ერთი საუკეთესო ნაკრების წევრია, რომელიც კი ოდესმე გვინახავს.

ხანდახან ჭკუიდან გადადის, არის მომენტები, როცა გიჟდება და თამაშებში ზედმეტ ემოციებს იჩენს, ეს მისი პრობლემა ყოველთვის იყო, მაგრამ ნუ დაგვავიწყდება, რომ იგივე პრობლემა აქვს უეინ რუნისაც".



"არ მანაღვლებს, იყიდის თუ არა მას "იუნაიტედი", ან იქნება ეს კარგი შენაძენი თუ არა, მაგრამ თუ ის არ არის მსოფლიოს ერთ-ერთი საუკეთესო მოთამაშე, მაშინ ვინ არის?

თუ მისი ტიტულების რაოდენობა არ იძლევა მისი შექების საბაბს, მე ან პრემიერ ლიგის ნებისმიერ სხვა მცველს რა შანსი გვაქვს?

ვფიქრობ, უპატივცემულობაა - მან ესპანეთის ნაკრებში დაახლოებით 130 თამაში ჩაატარა. თან მიკი მაუსის გუნდში კი არ თამაშობს. გამიგია, რომ ზეწოლას ვერ უმკლავდება და შეცდომებს უშვებს, მაგრამ რომელი მცველი არ უშვებს შეცდომებს?

მადრიდის "რეალის" მსგავს გუნდს უკეთესი მცველის პოვნა რომ შეეძლოს, იპოვიდა, მაგრამ არ შეუძლია. რამოსი ყოველკვირა თამაშობს, მან ყველაფერი მოიგო და ხალხი მაინც აკრიტიკებს.

ტოპ-კლასის ცენტრალური მცველი საშინლად ცოტაა ახლა, წინა წლებს ვერც კი შეედრება. თუ "იუნაიტედი" რამოსს ვერ შეიძენს, ან არც უნდა შეძენა, მაშინ ვისი ყიდვა უნდა?"

წყარო: goal.com