"MUTV"-ის ექსპერტების, ქუინტონ ფორჩუნისა და სემი მაკილროის განცხადებით, "მანჩესტერ იუნაიტედმა" ტიტულისთვის ბრძოლა პრემიერ ლიგის პირველივე მატჩიდან უნდა დაიწყოს.

"წითლებმა" ლუი ვან გაალის თავკაცობით, გასული სეზონი მეოთხე ადგილზე დაასრულეს, მაგრამ გულშემატკივრები მაინც ოპტიმისტურად უყურებენ ჰოლანიდელი სპეციალისტის მეორე წელს "ოლდ ტრაფორდზე".

თუმცა, თუ "იუნაიტედს" ნამდვილად სურს მომავალ წელს პრემიერ ლიგის მოგება, მან თავიდან უნდა აიცილოს ისეთი საშინელი სტარტი, როგორიც გასულ წელს ჰქონდათ (13 ქულა 10 თამაშში).

"გასულ სეზონში ძალიან არეული შედეგები გვქონდა, თუმცა ეს აღარ მოხდება, ამის გარანტიას გაძლევთ" - განაცხადა ფორჩუნმა. "მენეჯერმა უკვე დააგროვა საკმარისი გამოცდილება პრემიერ ლიგაში, მოთამაშეებს ესმით, რას მოითხოვს ლუი მათგან და ყველა ხვდება, რომ ეს ძალიან მნიშვნელოვანი სეზონი იქნება."

ჩვენ აუცილებლად უნდა მოვიგოთ რომელიმე ტიტული, მთავარი კონცენტრაცია სწორედ პრემიერ ლიგისკენ იქნება მიმართული, რომელსაც "ტოტენჰემთან" მატჩით დავიწყებთ. ვიმედოვნებ, რომ ლონდონელებთან კარგ თამაშს ვაჩვენებთ და სამ ქულასაც მოვიპოვებთ."

"იუნაიტედის" მომავალ სეზონზე კომენტარი ყოფილმა "წითელმა", სემი მაკილროიმაც გააკეთა. "რა თქმა უნდა, ძალიან მნიშვნელოვანია, რომ მომავალი სეზონი უფრო წარმატებულად დავიწყოთ.

პირველი თამაში, მნიშვნელობა არ აქვს ვის წინააღმდეგ იქნება, ყოველთვის ძალიან რთულია, რადგან ეს გახსნითი მატჩია და ყველას სურს, კარგი სტარტი აიღოს. თუმცა იმის გათვალისწინებით, რომ ეს "დეზებია", ტოპ ექვსეულის წევრი, წარმატების მიღწევა განსაკუთრებულად მნიშვნელოვანი იქნება.

წინა სეზონი წარუმატებლად დავიწყეთ, მაგრამ მენეჯერმა უკვე საკმაოდ ბევრი იცის პრემიერ ლიგის შესახებ. იმედი მაქვს, რომ ამ ზაფხულს კიდევ რამდენიმე ფეხბურთელს დავიმატებთ და თავის გასამართლებად არანაირი მიზეზი აღარ იქნება. ახლა ყველაფერი ჩვენზეა დამოკიდებული, საჭიროა კარგი სტარტი ავიღოთ, მნიშვნელოვანი მატჩები მოვიგოთ და მთელი სეზონის განმავლობაში ვიბრძოლოთ ტიტულისთვის."

გასულ ოთხშაბათს ოფიციალურად გამოცხადდა 2015/16 სეზონის კალენდარი, რომელზეც ბევრი კომენტარი გაკეთდა გულშემატკივრებისა და ექსპერტების მხრიდან. მაკილროი თვლის, რომ "იუნაიტედისთვის" გადამწყვეტი ოქტომბრის თვე იქნება, როდესაც გუნდი "არსენალს", "ევერტონს", "მანჩესტერ სიტისა" და "კრისტალ პალასს" დაუპირისპირდება.

"ვფიქრობ, ოქტომბერი იქნება მნიშვნელოვანი გამოცდა გუნდისთვის, თუმცა იმ დროისთვის რამოდენიმე მატჩი უკვე გვექნება ჩატარებული და იმედი მაქვს, რომ მომზადებული ვიქნებით. "სიტი", "არსენალი" და "ევერტონი" არიან კლუბები, რომლებიც მაღალი მიზნებისთვის იბრძვიან. ვან გაალს კარგად ესმის, რომ ამ შეხვედრებში აუცილებელია წარმატების მიღწევა."

ფორჩუნი ფიქრობს, რომ "მანჩესტერისთვის" არანაკლები მნიშვნელობა ექნება ბოლო 5 თამაშს: "ასტონ ვილას", "ვესტ ჰემის", "ლესტერის", "ნორვიჩის" და "ბორნმუთის" წინააღმდეგ. მატჩებში, სადაც "იუნაიტედი" აშკარა ფავორიტი იქნება და შეძლებს პრემიერ ლიგის ტიტულისთვის ბოლომდე ბრძოლას.

"ფურცელზე ყველაფერი სხვანაირად ჩანს, მე იმედი მაქვს, რომ ეს გუნდები იმ დროისთვის არ იქნებიან გასავარდნ ზონაში. ინგლისში ყველა მატჩი რთულია, თუმცა დარწმუნებული ვარ, ამ მატჩებს კარგი ფორმით შევხვდებით და 15 მაისს, "ოლდ ტრაფორდზე" პრემიერ ლიგის თასის აღმართვას შევძლებთ."

წყარო: ManUtd.com