დღეს ოფიციალურად გაიხსნა სატრანსფერო ფანჯარა და ფეხბურთის გულშემტკივრებიც აქტიურად ვადევნებთ განვითარებულ მოვლენებს თვალყურს. ტყუილი იქნება თუ ვიტყვით რომ სანერვიულო არაფერი გვაქვს, რადგან დარჩენაში დარწმუნებული ფეხბურთელი ამდენი ხანი, მითუმეტეს ასეთი ვნებათაღელვის ფონზე, დიდხანს ვერ შეინარჩუნებდა სიჩუმეს. ფაქტია, ესპანელი კიპერი მადრიდისგან ელოდება შემოთავაზებას, რადგან მანჩესტერისგან მან უკვე მიიღო იდეალური შემოთავაზება, რომელზეც კალმისტარი ჯერ-ჯერობით არ დაუკარებია - არც უარი უთქვამს და არც თანხმობა განუცხადებია. ამ სტატიაში მინდა შემოგთავაზოთ ანალიზი იმისა, თუ რა მდგომარეობაა ესპანელის ირგვლივ და რას უნდა ველოდოთ მისგან.

ჟურნალისტები აქტიურად წერენ დე ჰეას შესაძლო ტრანსფერზე და ამის საბაბს თავად ესპანელი აძლევს. გასაგებია, რომ ტაბლოიდები ხმაურიანი ტრანფერებისა და სიახლეების მოყვარულები არიან, მაგრამ მათი აქტიურობა ძალიან მოქმედებს გულშემატკივრებზე. დიდმა ნაწილმა უკვე აიცრუა გული ესპანელზე და მიუხედავად იმისა, რომ მისი დარჩენის მომხრეები არიან, მაინც ალმაცერად უყურებენ დავიდის სამომავლო კარიერას წითლების შემადგენლობაში.

მანჩესტერის პირველი ნომრის წასვლასთან დაკავშირებით სპეკულაციები მას შემდეგ დაიწყო, რაც ესპანელმა კიპერმა უპასუხოდ დატოვა მისი ამჟამინდელი კლუბის შემოთავაზება, რომლის მიხედვითაც დე ჰეა მსოფლიოში ყველაზე მაღალ ანაზღაურებად მეკარეებს შორის შევიდოდა. კონტრაქტი მართლაც ზღაპრულია, უკეთესს ალბატ ვერც მადრიდი შესთავაზებს, მაგრამ პირველი ნომერი კვლავაც დუმს. რა სჭირდება მას? - ამაზე პასუხის გაცემა ერთი შეხედვით მარტივია, მაგრამ დე ჰეასთვის, როგორც ჩანს, ყველაფერი ბურუსითაა მოცული.

იუნაიტედის ლეგენდები ესპანელ კარის დარაჯს "იუნიატედში" დარჩენისკენ მოუწოდებენ. მაგალითისთვის, გარი ნევილმა საჯაროდ მოუწოდა დავიდს კარგად დაფიქრებული არჩევანის გაკეთების დროს და ისიც დაამატა, რომ მისი აზრით, საუკეთესო ვარიანტი გუნდში დარჩენა იქნება. ლუი ვან გაალს უკანასკნელ სამ თვეში პრესკონფერენცია არ ჩაუტარებია ისე, რომ დე ჰეასთან დაკავშირებით კითხვა არ დაესვათ ჟურნალისტებს. ჰოლანდიელი ვაჟკაცურად უძლებდა ცდუნებას და პასუხობდა, რომ ყველაფერი მხოლოდ შიდა სამზარეულოში რჩებოდა და ამ საკითხს არ ასაჯაროებდნენ, მაგრამ უკანასკნელ პერიოდში ზეწოლა იმდენად გაიზარდა, რომ ვან გაალმა ვეღარ გაუძლო ცდუნებას და აღიარა, რომ დე ჰეას გადაწყვეტილება არ მიუღია. " ჩვენ შევთავაზეთ მას საუკეთსო კონტრაქტი, თუმცა მას არაფერი უპასუხია. გადაწყვეტილება თავად დე ჰეამ უნდა მიიღოს. ჩვენ ყველაფერს ვაკეთებთ, რომ ის გუნდში დარჩეს." - განაცხადა "იუნიატედის" მთავარმა მწვრთნელმა.

არც მანჩესტერის ფეხბურთელები იშურებენ დევიდის მიმართ მიმართვებს და საქებარ სიტყვებს. გულშემატკივრები განსაკუთრებით აქტიურობენ , რათა დაანახონ დე ჰეას თუ სად არის მისი ადგილი, თუმცა ჯერ-ჯერობით ყველაფერი გაურკვეველია.

დღევანდელი ჩვენი სტატიის მიზანია გავაანალიზოთ ორივე შესაძლო ვარიანტი და დავადგინოთ თუ რატომ უნდა დარჩეს ან წავიდეს "იუნიატედის" პირველი ნომერი.




რატომ უნდა დარჩეს?

დავიდ დე ჰეა "იუნიატედში" 2011 წელს გადმობარგდა სერ ალექს ფერგიუსონის მოწვევით. სუსტი, გამოუცდელი, თინეიჯერი დე ჰეა "იუნაიტედის" პირველ ნომრად პირველივე სეზონში იქცა და მას უდიდესი მისია ეკისრებოდა - ვან დერ სარის ჩანაცვლება. ასეთი დიდი გამოწვევისთვის ჯერ კიდევ მოუმზადებელმა მეკარემ უდიდესი და უმძიმესი გზა განვლო იმ მწვერვალამდე , სადაც დღესაა. რომ არა მანჩესტერი, არავინ იცის სად ან როგორ იქნებოდა ის დღეს. ფიზიკურად, მორალურად და პროფესიონალურად, ესპანელი კიპერი სწორედ ინგლისურ გრანდში განვითარდა და მსოფლიოს ერთ-ერთ საუკეთესო მეკარედ ჩამოყალიბდა. შედეგად, გულშემატკივრებმა უკანასკნელ ოთხ სეზონში ორჯერ ზედიზედ დაასახელეს ესპანელი წლის საუკეთესო ფეხბურთელად. მსგავსი შედეგით ბევრი ფეხბურთელი ვერ დაიკვეხნის.

რა მისცა მანჩესტერმა დე ჰეას? - ეს ალბათ ყველაზე სულელური და მარტივი კითხვაა, თუმცა მეტი თვალსაჩინოებისთვის მაინც დავსვათ. პასუხი ასე ჟღერს - ყველაფერი ! ფანების სიყვარული , მწვრთნელების ნდობა, საერთაშორისო აღიარება, გამოცდილება, პროფესიონალიზმი, დაფასება და ჯერ უმოქმედო ზღაპრული კონტრაქტი. გარდა ამისა, პრემიერ ლიგის ოქროს მედალი, რაც მტრის ბანაკის ყოფილ კაპიტანს აუხდენელ ოცნებად ექცა (ს.ჯ) . რა შეიძლება მეტი ინატროს დიდებულმა ფეხბურთელმა?

ამას გარდა, ატლეტიკო მადრიდის აღზრდილმა ფეხბურთელმა, რომელმაც პირობა დადო, რომ არასოდეს გადავიდოდა მისი ყოფილი კლუბის მტრის სამეფოში, შეიძლება დაივიწყოს ფიცი და ერთდროულად ორი კლუბის ფანები გადაიმტეროს?




რატომ უნდა წავიდეს?

ზემოთ ჩამოთვლილი კომპონენტები, როგორც ჩანს, არ არის საკმარისი დე ჰეასთვის სრული ბედნიერებისთვის. ტაბლოიდები გასულ თვეებში აქტიურად წერდნენ იმის შესახებ, რომ დავიდი თავს კომფორტულად ვერ გრძნობს მანჩესტერში, რადგან ოჯახთან და შეყვარებულთან სიშორე მასზე დიდ გავლენას ახდენს. ამ მიზეზით, უკვე დატოვა მანჩესტერი რამდენიმე ფეხბურთელმა გასულ წლებში (მაგ: ფორლანმა), თუმცა არის ეს საკმარისი მიზეზი გუნდში ლიდერად დამკვიდრებული ფეხბურთელის წასვლისთვის? - ეს დე ჰეამ უკეთ იცის.

რაც შეეხება საფეხბურთო ფაქტორს - უკანასკნელ რამდენიმე წელიწადში "იუნიატედის" ჩავარდნა ევროსარბიელზე აშკარაა, რასაც ვერ ვიტყვით "რეალ მადრიდის" შესახებ. იდეალურ ფეხბურთელს მუდამ სჭირდება გარანტია, რომელ სტაბილურად ითამაშებს ჩემპიონთა ლიგაზე და მინიმალური მიღწევა 1/4 ფინალი იქნება. ამის გარანტიას, მადრიდი, უკანასკნელი შედეგებიდან გამომდინარე აშკარად აძლევს. - მაგრამ, რას იტყვით იმაზე, რომ "იუნიატედში" ახლა იწყება აღმშენებლობის ხანა და არაა გამორიცხული სწორედ მანჩესტერმა დაამარცხოს რომელიმე ეტაპზე ესპანური გრანდი?

ამ ყველაფერს ემატება ისიც, რომ იკერ კასილასი მადრიდულ კარიერას ასრულებს, რაც იმას ნიშნავს, რომ დავიდს მუდმივი სათამაშო დრო ექნება გუნდში. პირადად ჩემთვის, არც ესაა საკმარისი მიზეზი მანჩესტერის დასატოვებლად, მაგრამ აბა მე ვინ მკითხავს?

არჩევანი, მართლაც რომ დე ჰეაზეა. აირჩევს ის ერთგულ ფანებს, რომლებიც მზად არიან ბოლომდე გვერდში ედგნენ მას და გუნდს, რომელიც პატივს სცემს და მის შესანარჩუნებლად ყველაფერს აკეთებს, გუნდს, რომელიც ახლიდან იწყებს ისტორიის წერას და კვარცხბლეკზე საკუთარი ადგილის დასაბრუნებლად მომავალ წელს მთელი ძალით აპირებს ბრძოლას თუ მადრიდულ კლუბს, რომელიც ფეხბურთელებს ისე ექცევა, როგორც ფულის საჭრელ მანქანას (სანამ გამართულია, ზედ ევლება. როგორც კი შეფერხებები ექნება, თავიდან იშორებს და უკეთესის ძებნას იწყებს) , ფანებს, რომლებიც შეცდომას არ პატიობენ და არც ფეხბურთელების მანქანებისთვის კვერცხების სროლას და არც მოედანზე სტვენას არ თაკილობენ? - ამას უახლოეს მომავალში ვიხილავთ.



სტატიის ავტორი : დიმიტრი სანაია
01/06/2015