"მანჩესტერ იუნაიტედის" მთავარმა მწვრთნელმა ლუი ვან გაალმა "არსენალთან" გამართული მატჩის შემდეგ თავის გუნდს უფრო მეტი ეფექტურობისა და მატჩის დასრულებისკენ მოუწოდა.

"წითელმა ეშმაკებმა" ზედიზედ მეორე მატჩში ვერ მოახერხეს "მეთოფეთა" დამარცხება და ანდერ ერერას მიერ გახსნილი ანგარიშის შემდეგ "ოლდ ტრაფორდზე" ფრეს დასჯერდნენ.

"სამწუხაროა, რადგან ტრავმებამდე ერთი საათის განმავლობაში უკეთესი გუნდი ვიყავით. ასეთი თამაშების დასრულება უნდა შეგეძლოს.

შეგიძლიათ თქვათ, რომ უიღბლონი ვართ, რადგან ზედიზედ მესამედ გავუშვით გოლი რიკოშეტის შემდეგ. ჩემს ფეხბურთელებს ვუთხარი, რომ ეს უიღბლობა არ არის, იღბალს შენ თვითონ ქმნი. ერთი საათის განმავლობაში ჩვენს მოწინააღმდეგეს ვჯობდით, მაგრამ ანგარიში მხოლოდ 1-0 იყო. შემდეგ "არსენალმა" თამაშში დაბრუნება მოინდომა, ჩვენ კი ერთად უნდა შევკრებილიყავით და უფრო კომპაქტურად გვეთამაშა - არ უნდა ვყოფილიყავით ისეთი გახსნილი, როგორიც ვიყავით".

კვირას ნაჩვენებმა შედეგმა "არსენალს" ბოლო ორ თამაშში მხოლოდ 1 ქულის აღების საშუალება მისცა, მაგრამ ეს საკმარისი აღმოჩნდა იმისთვის, რომ მესამე ადგილზე დამკვიდრებულიყო. "იუნაიტედმა" კი მეოთხე ადგილი უკვე გაინაღდა.

"ახლა ჩემპიონთა ლიგის საკვალიფიკაციო ეტაპის თამაში მოგვიწევს. ამ ტურნირზე ჯერ არ გავსულვართ. მოხვედრა კი ადვილი არ იქნება, რადგან შეიძლება შეხვდე მეტოქეს, რომელიც თავის საუკეთესო ფორმაში იმყოფება და ეს უნდა გავაცნობიეროთ. მაგრამ, რა თქმა უნდა, კმაყოფილი ვარ, რადგან სეზონის წინ მიზანი დავისახეთ და მას მივაღწიეთ".

წყარო: manutd.com