"მანჩესტერ იუნაიტედმა" 13 წლის შემდეგ პირველად დათმო ზედიზედ სამი შეხვედრა, თანაც ისე რომ ვერცერთში გოლის გატანა ვერ მოახერხა. მატჩის დასრულების შემდეგ, ჰოლანდიელმა თავკაცმა მომენტების რეალიზებაზე ისაუბრა და გუნდს ამ კომპონენტში მომატებისკენ მოუწოდა.

"რობინი თერთმეტ-მეტრიანებს კარგად ასრულებს, თუმცა დღეს გამონაკლისი იყო, ამასთან ერთად მეკარის კარგი თამაშიც უნდა აღვნიშნოთ, რომელმაც ურთულეს სიტუაციაში მოახერხა გუნდის გადარჩენა. რაც არ უნდა იყოს ასეთი შანსები უნდა გამოიყენო, რადგან ეს თითქმის 100 პროცენტიანი მომენტია, შენ წინ მხოლოდ კიპერი დგას და ეს საქმეს გიმარტივებს.

ახლა გოლების სიმცირეც სადარდებელი გაგვიხდა, რადგან ბოლო სამი შეხვედრაა გატანას ვერ ვახერხებთ. "ჩელსის", "ევერტონის" და "ვესტ ბრომის" წინააღმდეგ უამრავი მომენტი შევქმენით, თუმცა ვერც ერთი ვაქციეთ გოლად. ასეთ დროს, მენეჯერს გაქვს უფლება თქვა, რომ არ გაგვიმართლა. ოთხეულისთვის ბრძოლა თავიდან იწყება, კარგია რომ ყველაფერი ჩვენს ხელშია."

"ვესტ ბრომის" ფეხბურთელები მთელი თამაშის განმავლობაში საკუთარ საჯარიმოსთან იყვნენ განლაგებულები, ბურთის ფლობაში კი, მათ გასწვრივ მხოლოდ 20 პროცენტი ეწერა, რაც ამ სეზონში ყველაზე ცუდი შედეგია.

"მე ვიცოდი რა მოხდებოდა. მეტოქე დაცვაში "ავტობუსს" ჩააყენებდა და დიდი ძალებით ეცდებოდა თავის დაცვას. ამასთან ერთად, ფანტასტიურად ითამაშა მეკარემ. ყველაფრის გათვალისწინებით, ჩვენ მაინც მოვახერხეთ მომენტების შექმნა, მაგრამ დარტყმის განხორციელება რთული პოზიციებიდან გვიხდებოდა, რადგან უამრავი მცველი იყო მეკარის წინ.

მათი გოლი შანსიც კი არ ყოფილა - მათ ჯარიმიდან მოახერხეს გოლის გატანა, რიკოშეტის დახმარებით. ძალიან საწყენია, როცა ასეთ გოლს უშვებ და შეტევაში კი იღბალი ზურგს გაქცევს."