"გუდისონ პარკზე" თამაში არასდროს არის ადვილი, მაგრამ ეშლი იანგი დარწმუნებულია, რომ მისი გუნდი სამი ქულის მოპოვებას და მოგებათა ახალი სერიის დაწყებას შეძლებს.

"წითელი ეშმაკები" "სტემფორდ ბრიჯზე" განცდილი მარცხის შემდეგ წარმატების მიღწევას "ევერტონთან" მატჩში ეცდებიან.

ლუი ვან გაალის შეგირდები ჟოზე მოურინიოს გუნდის წინააღმდეგ დომინირებდნენ, მაგრამ სტადიონი ქულების გარეშე დატოვეს. თუმცა იანგი თამაშით მოხიბლულია და თვლის, რომ მის გუნდს ახალი მოგებათა სერიის ჩვენება შეუძლია.

"ჩელსისთან" განცდილ მარცხში პოზიტივს დავინახავთ, სადაც ვფიქრობდით, რომ არ უნდა წაგვეგო. ბურთსაც ვფლობდით და შანსებიც გვქონდა. ვგრძნობდით, რომ "ჩელსი" უბრალოდ იჯდა, მაგრამ თავისი გოლი მაინც გაიტანეს. სხვა დღეს კი ჩვენც მოვახერხებდით ერთი ან ორი გოლის გატანას.

ახლა კიდევ ერთი რთული მატჩი გველოდება. ყოველთვის რთული შეხვედრა გვაქვს, როცა "ევერტონს" გასვლაზე ვეთამაშებით. გულშემატკივარი მოედანთან ძალიან ახლოსაა და ყოველთვის, როცა იქ ვთამაშობთ, კარგ ატმოსფეროს ქმნიან. გვინდა გამარჯვებათა სერიას დავუბრუნდეთ და იქ სწორედ ამისთვის მივდივართ", - განაცხადა იანგმა.

"იუნაიტედი" ამჟამად პრემიერ ლიგის ცხრილში მესამე ადგილზე იმყოფება და მხოლოდ ერთი ქულით ჩამორჩება "არსენალს", რომელიც მომდევნო ტურში ლიდერ "ჩელსის" ხვდება.

"გუნდში ყველა დარწმუნებულია, რომ რაც შეიძლება მაღლა დავასრულებთ სეზონს. მეორე ადგილი ჯერ კიდევ ხელმისაწვდომია ჩვენთვის და მხოლოდ მატჩები უნდა მოვიგოთ. ყოველი მატჩი თასის ფინალს ჰგავს, უბრალოდ უნდა გავიდეთ და მოვიგოთ. საკვირაო მატჩს სრული თავდაჯერებით ვხვდებით და დარწმუნებული ვარ, თუ ისე ვითამაშებთ, როგორც ბოლო პერიოდში, წარმატებას აუცილებლად მივაღწევთ", - დაასრულა იანგმა.

წყარო: manutd.com