როგორც ამბობენ გამარჯვებულ გუნდს არ ცვლიან, თანაც ისეთი გამარჯვების შემდეგ, როგორიც "იუნაიტედმა" გასულ ტურში მოიპოვა. გუნდის თითოეულმა მოთამაშემ მაქსიმუმი გაიღო, რათა მეტოქე დაემარცხებინა და შედეგმაც არ დააყოვნა. დაცვის ხაზმა შესანიშნავად იმოქმედა და ერთი კითხვის ნიშანიც არ გაუჩენია, ამიტომ მათ შეცვლას არც მე და სავარაუდოდ არც ლუი გეგმავს - პლუს ამ ყველაფერს ისიც დაემატა, რომ სავარაუდო შემცვლელები: მარკოს როხო და ლუკ შოუ, როგორც ჰოლანდიელმა სპეციალისტმა განაცხადა, სათამაშოდ მზად არ არიან. იმედი მაქვს საკვირაო შეხვედრაშიც ისევე მშვიდად და თავდაჯერებულად იმოქმედებს ეს ოთხეული.





ვან გაალმა, როგორც ჩანს მოედნის ცენტრში იდეალური დუეტი იპოვა. კერიკმა და ერერამ საუცხოო პირველი ტაიმი ჩაატარეს და "დეზების" ნაქები ნახევარდაცვა მთლიანაც ჩაყლაპეს, მათ ფელაინიც ხშირად ეხმარებოდა, რომელიც ჩემი აზრით, დამსახურებულად დაასახელეს მატჩის საუკეთესო მოთამაშედ. ეს სამეული "ლივერპულთანაც" ძალიან პროდუქტიული იქნება, თუმცა საკითხავია როგორ წარმოაჩენს თავს ბელგიელი შკრტელის წინააღმდეგ. რაც შეეხება ფლანგებს: ალბათ ყველას გაუკვირდება იანგის არ ყოფნა, მაგრამ ჩემი აზრით ამჯერად სწორედ დი მარიას გამოყენება სჯობს, თანაც მარცხენა ფლანგზე, რადგან სწორედ ეს პოზიცია მიმაჩნია არგენტინელისთვის საუკეთესოდ. სწორედ იქ თამაშისას გაიტანა გოლები და გააკეთა უმეტესობა საგოლე გადაცემებისა, ინგლისში გადაბარგების შემდეგ.

მართალია, ხუან მატას საუკეთესო მატჩი არ ჰქონია, მაგრამ მისმა მოედანზე ყოფნამ შეტევები ერთი-ორად ააჩქარა და კრეატიული გახადა, თანაც იმის კვალობაზე, რომ ესპანელი თითქმის 2 თვე მხოლოდ 10-15 წუთ, სათამაშო დროს იღებდა.ალბათ ყველას გვახსოვს მისი თამაში "ოლდ ტრაფორდზე", "ლივერპულის" წინააღმდეგ, ხუანი უბრალოდ შეუდარებელი იყო.





ალბათ ამ პოზიციაზე ბევრი ლაპარაკი არ ღირს, უეინ რუნიმ 6 შეხვედრაში 5 გოლის გატანა შეძლო, მას შემდეგ რაც შეტევაში დაბრუნდა.

სრული შემადგენლობა: დე ხეა, ვალენსია, ჯონსი, სმოლინგი, ბლინდი, კერიკი, ერერა, მატა, ფელაინი, დი მარია, რუნი.