ლუი ვან გაალმა განაცხადა, რომ მას ანხელ დი მარიას წარმატების სჯერა და "სანდერლენდთან" ჩატარებულ ცუდ მატჩს არგენტინელი დიდი პასუხისმგებლობით მოეკიდა.
"შავი კატების" წინააღმდეგ ანხელმა ცუდი პირველი ტაიმი ჩაატარა, რის შემდეგაც ვან გაალს მისი შეცვლა შესვენებაზევე მოუხდა. მატჩის შემდგომ ჰოლანდიელმა სპეციალისტმა განაცხადა, რომ ადვილი არ იყო ასეთი დონის ფეხბურთელის შეცვლა, მაგრამ ანხელს დრო სჭირდება.
ლუი ვან გაალი თვლის, რომ ახალმოსული ფეხბურთელისთვის სირთულეების წარმოშობა ნორმალურია და არგენტინელი ფეხბურთელი ამისგან თავის დასაღწევად ბევრს შრომობს.
"ნებისმიერ ფეხბურთელს შეიძლება ჰქონდეს ასეთი სახის მატჩი - დი მარია არ არის ერთადერთი ფეხბურთელი, ვისაც ცუდი დღე ჰქონია. მას შეუძლია მომდევნო მატჩში მსოფლიოს საუკეთესო ფეხბურთელი გახდეს, ასე რომ, ვფიქრობ, ყველაფერი კარგად მიდის. ანხელი ძალიან კარგად ვარჯიშობდა და არამგონია რამე პრობლემა არსებობდეს.
უკვე ავხსენი, რომ პრემიერ ლიგის უფრო მაღალი რიტმი მნიშვნელოვანი ასპექტია. გარდა ამისა, ის ახალ გარემოს, ახალ კულტურას უნდა შეეგუოს, რაც ადვილი არ არის.
პრობლემა ეხება არა მხოლოდ დი მარიას, არამედ ჩვენ მიერ შეძენილ თითოეულ ფეხბურთელს. ეს მატჩის შემდეგაც ავხსენი. დააკვირდით სხვა ფეხბურთელებს, რომლებიც შევიძინეთ: ბლინდი, შოუ, ერერა, ფალკაო და ასევე დი მარია, და დაინახავთ, რომ ყველას აქვს პრობლემა. ჩემთვის ეს სიურპრიზი არ არის, გასაკვირი უფრო ის იქნებოდა, რომ სწრაფად მოეხდინა ადაპტირება. ჰოლანდიაში, ესპანეთსა და გერმანიაში ასეთი რამ მინახავს. როგორც უკვე ვთქვი, მას დრო უნდა მივცეთ, თუმცა არა მარტო მას, სხვა ფეხბურთელებსაც. უნდა მოვიცადოთ და ვნახოთ." - განაცხადა ვან გაალმა მატჩის წინა პრეს-კონფერენციაზე.